Cornelio Galas, tradizione: i vèci mistéri/ 2

Parlén ancora de vèci mistéri: stavolta del caglièr, del sartór, e del tapeziér

Quando i vegnìva en càsa a laoràr.
E magari ghe scampéva anca na sonàda co la fisarmonica e 'n piàt de polenta e qualcòs arènt da zacàr...
Alcuni artezàni, oltra che lavorar ne la so botéga i néva anca casa per casa.
Ma no zigàndo «dòne, dòne…» come v'ho dit l'altra volta. No, propri i néva perché ciamài da 'sti clienti.

 Scominziem dal caglièr
Na volta al’àm vegniva en casa el caglièr, el calzolaio. E, i dis, el se ferméva anche quatro o zinque dì a giustàr le scarpe de tuta la faméa o a farne adiritura de nòve.
No, no so se avè capì. El caglier el vegnìva en casa a laoràr.
Eugenio déto Genio el vegniva da Caneve. El se portéva tut quel che ghe servìva. La forma
soratùt, cioè n'arnés de fèr a forma de pè, po el martèl, tochéti de pèl e le zìcole, cioè tòchi picoi de coràm, de cuoio, che i bastéva per far i mezéti e meze sole.
El Genio da Caneve però el se portéva drio anca la so fisarmonica. La sera, nela stàla, dove se feva el filò, el soneva canzóm e walzer. Ma sol quando el nono el neva a dormir se podéva balàr co le putèle.
Oltre a scarpe e scarponi i contadini i dropéva le sgàrmere, na specie de scarpóm co la sola de legn e la tomàia de vachéta. Le féva en bel casim ste sgàlmere sui pavimenti de legn.
Le sgàlmere se le laséva sui ultimi gradini de le scale, prima de nar en cosina descólzi. E po’ nel lèt.
 
 El sartór
En casa vegniva anca el sartór o la sartina. E i se troveva davanti en mucio de robe da ramendàr, da tasselàr, rattoppare. Bisogna anca dir che alóra i vestiti i pasèva da pàre en fiòl, da fradel grant a quel medio a quel de drio, a quel pu picol.
E alóra bisognéva revoltàr, ridàrghe misure giuste ai vestiti.
Sti sartóri che n'eva en òpra, cioè a laorar en casa, i se ferméva «a cost» cioè i magnéva co la famèa. E anca lì l'era na gara. Per dir: se ghe feva contàr storie a ’sti artezàni così i parléva e i altri entant i magnéva.
Sol che uno de Arco, evidentemente taià, furbo, l'ha capì dai e dai el tài del prà. E quando entant che i magneva i gh’à domandà come la néva a finir sta storia el gh’à dit «Ah l'è mort da en colp...»
El'ha tacà via a magnar pu svelto dei altri.
 
 El tapeziér
E per finir gh’era el tapeziér. A Arco prima dela guera, la prima, gh’era en zerto Fritz. El vegnìva dal Tirolo e l'aveva sposà na zerta Tullia, ciamàda apunto Tulia Frìza.
Sta chi l'era restàda vedova e l'aveva sposà dopo en zerto Turrini detto Giòna. Quindi l’è deventàda Tulia Giòna.
El tapezièr el vegniva ciamà a meter a posto i làstizi, quei dei materàsi. La lana, el ségras, dal tedesco see-gras, crine vegetale, la vegniva laoràda per po esser rimessa a post e cosìda coi ’sti làstizi ne la so fédera.
Se useva comunque anca altri tipi de materassi come i paioni pieni de paia o scartòzi de grantùrch.
E i dis che se dormiva forse mèio che sui materassi de adès…