Cornelio Galas, saóri/ 8 – I Grostoi de carneval

Do èti de farina, n’of, en bicierin de sgnapa, mèz èto de zucher, do cuciàri de oio de oliva extravergine, zucher a velo e oio per frìzer

>
Ne fénte ’sta spanzàda de gróstoi che zamài sen vizini a Carneval?
L’è semplizòn. Anca se da altre bande a ’sti dòlzi i ghe ciàma ciàcere, ghe se vol però i fàti (che no l’è i masci dele fàte) per farli.
Quanti ’n fènte? Scominzièn con quel che ghe se vòl per quatro. Se volè farne per oto basta che dropèghe el doppi dele robe che ve dirò. Volè fàrne… da vènder?  Moltipliché el tut per quatro, per dése… Ala ène( dove la ène l’è el numero dei magnóni diviso per quatro).
Ocio però che l’è ’n magnàr fritéga ne l’oio. Meio star endrìo se gh’avé qualche malàm al fegato o al stómech.
 
Alòra: do èti de farina, n’of, en bicierìn de sgnapa (ho dìt en bicierìn neh…), mèz èto de zucher, do cuciàri de oio de oliva extravergine (meio se l’è del nòs, cioè dela Busa), zucher a velo (’n sarà vanzà dai panetoni de Nadàl…) e oio per frìzer.
Ah, gh’è anca quei che ghe mete dénter en pèl de sàl e na scorza de limòn: oh, ognun gh’à i so gusti.
 
Pronti cóla farìna. Fé na specie de vulcano e nel bùs en mèz zò che vaga quel che gh’era ne l’of che avrè spacà (devo ensegnarve come se spàca n’of?).
Per quel che gh’era ne l’of, voi dir ròss e bianch. Tut Semper nel bùs del vulcano de farina, meté anca el zucher, i do cuciari de oio, el bicierìn de sgnapa (sol la sgnàpa, no anca el bicierìn).
Eco, adès scominzié co l’oio de gómbet a ’mpastàr. Ancora. Ancora. El so anca mi che i gróstoi i li vende. Che adès pensé che dopo dovré anca netàr el piano dela cosìna.
Che sarìa stà meio nar fora a magnar na piza.
Ma zamài s’è ’n bàl. E bisogna balàr.
 
Dai che no va miga bèn come stè empastando. Ancora, oscia. No saré miga zà strachi?
Quando la pasta l’èi liscia, senza petolòti, bèla da vedèr e tuta del stés bèl color, ciapéla su, metéla en d’en piat fónt e larch o en qualcosa de gualìf che gh’avè en cosina.
E meté tut a polsàr dove no sia massa calt. Cioè no sora la fornèla, vizìn al gas dove avé méss su magari la lengua da far a léss.
Gh’è zerti che dìs de méter tut e del frigo. Ma secondo mi, en ’sta stagión, va ben anca, semài, sul davanzal dela finestra (ocio che no la casca zo demò).
Basta ‘na mezzoréta.
 
Eco, adès col matarèl tiré la pasta. Che la vegna fina. Come quando fè le taiadèle per capirne. No come quando fè i gnochi.
E se no avé mai fat le taiadèle e gnanca i gnochi prové a pensàr che quando magné i grostoi se avè tirà la pasta massa grossa ve parerà de magnàr biscoti gròssi, magari duri e sfritegài ne l’oio. Ensòma, meio se vei fora qualcòs tipo sfòia.
Dopo, quando la pasta l’è tuta bela spianàda, ciapé nà rodelìna de fèr, quela che de solit se dropa per taiàr le pizze.
No la gh’avè: va ben anca en cortèl ma l’è pu ’n casin.
Comunque bisogna taiar su tut a tochéti, a retàngoi. No massa grandi, no massa picoi.
Podè anca farghe le trèze. Qualche taietìn en mez.
Far triangoi. Zerchi. Quel che volé.
 
Frìzzelo l’oio? No ’l deve fumar neh… Eco, denter tre quatro ala volta, dipende da la grandéza dela padéla, i tochetini de pasta.
Voltèi che no i se brusa da na banda. No ocór che i deventa neri. Basta che i se sgiónfa.
Quando ve par che i abia ciapà el color giust dei gróstoi, tiréi su con qualcòs che ’l li lassa sgozàr.
E metéi su na supiéra con sóto la carta sorbente. No quela igienica, me racomando. Basta anca qualche mantìn.
Sóra ’na spruzadina de zucher a vél (basta méterlo nel colin e girar pian piani dedòti). E via.
Se pòl magnarli anca quando i è ancora tepidi. Ma meio ’spetàr che i se ’nfredìsa del tut.
 
Cossa beverghe drio? Quei che se n’entende i me dis moscàto zàlt.
En Trentin ghe n’è de molto boni.
Ma vardé che anca en bel prosechìn… el se lassa, secondo mi.