La festa del papà – Di Cornelio Galas

No so se noi, papà e noni, sém stàdi en sti ultimi ani propri en bel esempi da narghe drìo...

Col passàr del temp, 'cramento, se finìss per far confusióm. Perché no se sà pù - parlo per mi, se sa - se l'è la festa del papà o quéla del nono. E a mì, chisà come mai, me vèi sèmper 'n mént me pòr papà. Quante ghe n'ho fàt. De tuti i colori, pòr òm. E te vèi, come dir, 'n magóm a pensàr che adès no 'l gh'è pù.
Sùbit dopo, te pénsi: «Diaolporco, sóm papà da 'n pèz, e da ani anca nòno. Còssa ghe laserònte a me fiòl, a me neó?

«De zerto no ho mantegnù la promésa fàta quando ero nei scàut (Lassàr 'l mondo entorno mèio de come te l'hai trovà, neh), de sicùr no ho fàt asà - a parte quel che i troverà da zacàr, da rivender, da meterse 'n dós de quel che vanzerà nel me armàr, i soldi, pochi, en banca und so waiter - per darghe en domàm mem balerìm.
 
Che te pensi: i ho fàti studiar 'sti bòci. Pagà libri, coriéra, mensa e bàle varie.
Per còsa? Che adès se la ghe va bèm, anca se i gà 'l famoso tòch de carta, i li ciàpa (forsi) dove se risponde al telefono en 'den cameróm pièm de telefoni?
De chi èla la colpa? Ah, savérlo... Vòt vedér che ala fìm sém stài noi, i papà, i noni che ancòi i ne fà festa, a magnàr fòr tut?
Noi che avém votà a so temp Dc, Pci, anca Di Pietro per quel.
Noi che avém més sù quei che prima i dàt fòra i vaucièr e adés i li tìra de volta?
Noi che co l'euro ne paréva de podér spender e spander en ciocolata e zigaréti anca dopo el Brenero e adès capìm che sém ancóra poréti, co le pèze sul cul?
 
Ma osc'ia, cosa avénte fàt mai per darghe ai nóssi zóveni sol en telefonìm che fà anca le foto per sentìrne a posto? Squasi contenti de avérli sistemài cosìta?
L'è vera. De sòlit l'è meio darghe - a quei che gà bisogn de magnar - na cana da pescàr pitòst che 'l pés zà pront nela padèla.
Ma forsi a 'sti zóveni ghe sarìa servì pù en bel esempio da copiàr.
E no so se noi, papà, noni, sém stàdi en sti ultimi ani propri en bel esempi da narghe drìo...