Dai, cónteme ancóra quéla del Palazét... – Di Cornelio Galas

L'è da sti ani che tra Riva e Arco i néva d'acordi come cagn e gat e che la Busa la néva envanti come en car a tre ròe. I beghéva su tut… Adès no i bèga pù

- Dai, cónteme quéla del Palazét...
- Ma l'è vècia, dai, no la fa pù rider.
- No, dai cóntemela l'istéss che me fago do ghignàe.
- Se no te vòi alter...
- Dai, dai, che zèrti tòchi no me i ricordo zamai pù.
- Alóra... L'è da sti ani che tra Riva e Arco i néva d'acordi come cagn e gat e che la Busa la néva envanti come en car a tre ròe. I beghéva su tut. L'ospedal nòf? A Riva. No, a Arco. No 'n mèz. Le fére, i congrèsi? Perché sol a Riva? Alora a noi de Arco dové darne almém qualcòs per empienir el Casinò.
- Sì, sì me ricordo de ste robe, và envanti...
- Bom. Fato sta che, dàmela tòmela, vist che quei de Riva a 'n zerto punto i gavéva na bèla squadréta de palacanestro, i ha scominzià a butàr per averghe anca en Palazét per zugàr al cuèrt...
- Sì, dai, me ricordo anca ste robe chi. Che gh'era el Bruno Santi presidente, la Cartéra de Riva che tiréva fora i soldi, che i è arivài en serie B, che squasi i nèva anca pù sora...
- Ma alora cóntela ti no?
- Scusa, scusa... l'era tant per dir.
- Ensoma, dai e dai, sto palazét i l'ha anca trovà, propri a metà stràa, dove gh'era quel che binéva sù le robe de fer vecie, quele de plastica... al Rigoti. En tendóm però. Tipo quel dei circhi. E difati i gà fàt denter anca tanti spetàcoi co le tigri i lifanti...
- Dai, tàia...
- Tuti però che i voléva en palazét del sport vero, osc'ia. No quel tendóm che se tiréva 'n pel de vent en pù o se fiochéva... En palazét coi muri. I so posti per cambiarse, per pisàr, ensoma per star comodi.
- Eco, adès ariva el toch che me pias de pù.
- Tasi demò. Se no la mòco chi. Alora, tira buta e mòla ale tante i se mete d'acordi. Tra Riva e Arco. Perché gh'era en bàl anca i progieti del cine e del teater neh. Nesuni voleva lasàrghe qualcos de pù a l'alter. E cosìta a Arco i s'è contentai del teater e del cine. E a Riva i gà dat i soldi per el palazét.
- Tuti propri contenti?
- Se te sai come la va a finir còntela ti la fim, móna...
- No, l'èra tant per dir.
- Quei de Arco, per el teater e 'l cine a l'ex Quisisana, i gavéva dat i laóri a l'impresa Azolini, oh, miga na dita dal pit neh, sol che dopo l'è nada nei gazèri. E l'ha piantà lì tut, anca la gru che dopo i è vegnui a torsela de volta...Tut mal ala fim i è riusidi a far sto cine e sto teàter.
- E quei de Riva?
- I ha raspà anca lori i soldi e 'n qualche maniera i ha fat sto palazét su a la Baltera, ensèma ai capanóni en pù per la féra.
- Tut bem no?
- Dai, no stà far quel che è vegnù zó co l'ultima néf.
- Te gài resom, ma sto toch chi dela barzeleta l'è quel che me fa nar semper en tera dal rider. Varda me stàgo zà pisàndo dòs...
- Va bem, ma stame lontam che no volerìa mai sporcarme... Ensoma, adès en quel cine, en quel teater de Arco, va fàra pu soldi per la luce, per el riscaldamento de quel che vei denter coi biliéti. L'altra sera i era en tréi al cineforum. Ma se sa, se te voi véderte en cine nof, còmot, bever e fumar entant che te 'l vardi, adès basta empizar la televisiom tacàda al compiuter no. El teater? I và zo tuti pu volentera en quel de l'oratorio de via dei Pomeri. I fa ancora le vecie comedie en dialèt. E te paghi de mem.
- E al palazèt de Riva?
- Varda, lì l'è nada, se posibil, anca pèzo.
- Perché?
- Dai, osc'ia, i è anca bravi, zóveni, pieni de bona volontà quei de la Virtus, ma se a Trent zuga l'Aquila en serie A, dove vòt che vàga la zènt? Gh'è da dir tut mal che l'alter dì, quando propri l'Aquila l'è vegnua a Riva a far n'amichevole el palazét l'era squasi tut piem neh...
- Basta, férmete... no ghe la fago pù.