Lopio-Busa, i ha fat zamai l’apalto – Di Cornelio Galas

Benevento… Vot veder che adès i tira for el trenim de na volta?

- E ti che te disévi che la Lopio-Busa no i l'avrìa mai gnanca scominziàda... àt vist, i à fat zamai l'apalto...
- Sì, ò lèt ancòi sul fòi...
- Tut chi? No sét contènt che ale tante st'an che vèi parte i laóri?
- Sarà...
- Ma come, varda che i à demò avèrt le buste neh... E adès ghè el nome de la dita che farà quéla galeria e tut el rest.
- Dìsit?
- No 'l digo mi, osc'ia, el ghè scrit anca sul giornal... Ma i lèzit ti i giornai o no?
- Sì qualcòs ò sentì.
- Te séi el solit bastiàm contrari diaolporco. Varda che chi se parla de carta che canta neh… Se te vinzi n'apalto i laóri te devi farli cramento....
- Ma gh'era sol na dita me par...
- 'Sa vol dir... quéla gh'era e quéla l'ha ciapà i laóri dai.
- Mah... che te diga... No me convinze tut st'ambaradam.
- E perché?
- Oh che vegna fòra che la gò su coi teroni neh, che soto naja i amizi pù bei l'era propri quei che vegniva da 'n zo osc'ia. No, l'è che con tute le dite trentine, pù vizine a sti posti, gnanca una la gà provà dai....
- Se vede che le à fat i so conti...
- Ma dai, co la fam de mistéri, de soldi che ghè ancora en giro... nesuni che almem prova a butar zo en preventivo...?
- Se vede che le gà altri mistéri en bal... Che 'n sàt ti?
- Mi n'idea su sto ambaradàm la gavrìa...
- Quàla?
- Secondo mi l'è tut questióm de quel che voleva la Provincia en ste galerie che i volerìa far...
- Dìme, dìme, par che ti te sàpi quel che nesuni sa... ma àt fat le Iti per caso?
- No, però qualcòs me sóna mal...
- Cossa?
- Che la dita che à ciapà i laóri de la Lopio-Busa la vègna da Benevento.
- Alora l'è vera che te ghe la gài su coi teroni dai... dìlo!
- Ma no te digo. L'è che...Benevento osc'ia...
- Benevento, e alora?
- Benevento deve averghe a che far co l'aeraziom... magari la Provincia la voleva na dita che la fés sti sistemi per cambiar l'aria come se deve. E pu bem de quei de... Benevento, dai...
- Zerto che ti en fato de sbarar monàe te saréssi meio de quei che sbàra al piatèl a le Olimpiadi neh...
- No perché gh'è n'altra roba de mèz...
- Quàla, oscia, dime...
- Quéla storia che l'asesór Daldoss l'à tirà fora en sti dì chi... quela del treno.
- Cosa ghe zentra adès la storia del treno?
- Secondo mi le dite trentine le à fat en ragionamento: se i pensa de far el treno lassa pur che quei de Benevento i vinza el bando che dopo tanto i vei su la nòssa...
- Scusa neh, su la nòssa en che senso?
- Nel senso che en Trentim se sa da 'n sècol dove gh'era i plinti del vecio trenim tra Roveredo e Riva... basta na getada chi, na getada là, e meterghe zo de nof le sìne... te vai sul sicur. E senza riméterghe tanti soldi... t'en ciapi tanti osc'ia.
- Me par na monada...
- Spèta, spèta... 'n parlèm da chi a qualche am... magari dopo le eleziom de st'am che vèi. Capiset come…? Ah, e stà 'tento che no ghe sia ricorsi al Tar. Perché alora -  come sta suzedendo col nof ospedal de Trent -  i fa prima a far el treno che la galeria neh...