Som ciapà – Di Cornelio Galas

Ve capita mai de averghe mile robe da far e 'l tèmp per farne, forse, sol una e mez?

Ve capita mai de averghe mile robe da far e 'l tèmp per farne al massimo, forse, sol una e mez?
Quando ve trové en de na situaziom del genere l'è come se i altri e tut quel che ve stà 'ntorno i se trasformess en tanti indiani coi archi e le frece.
Ve sentì circondai ensoma. E rispondé mal: «Dai, dai no sta romper i cojoni anca ti che ancoi no l'è propri giornada. Ma ve se messi tuti d'accordo per farme deventar mat? Ocio che adess trago zo copi... Ma dio te... beca, no vedit che som ciapà?»
 
En pratica tirè zò el grigliom. Da sta panda le vosse miserie, da quel'altra quele dei altri.
E 'n mez fil spinà, per tera vedri roti e viscio tacaiz miscià a benzina... Che se buti sol la zendro del zigaret ciapa foc el mondo.
Pò magari suzede che quel por laor che era vegnù a trovarve propri quel di el voleva sol dirve che el di dopo el saria nà a l'ospedale... e nol saveva se po' el saria vegnù fora.
Voi l'avè mandà a quel paes. E el di del funeral v'el ricordè. Ecome se ve 'l ricordè.
 
E ricordè anca che ere ciapài da en pac de giornai veci da portar zo en cantina... N'impegno che no podéve rinviar, se sa.
Eco, na ciacerada longa per dir che sem noi che dovem tratar el temp come en noss dipendente.
L'avem comprà noi l'oroloi, no? E alora che 'l faga el so mister senza tant roter le bale.
Se no se pol sempre darghe na smartelata, come voleresem sempre far la matina co la sveglia.
 
Dirè: però bisogna anca timbrar cartelim, nar a tor i boci a scola, rispettar dei orari en banca, dapertut...
L'è vera, ma mi parlo de quel che i ciama tempo libero.
E che envéze coi indiani el perde sempre.
Anca se quei i g'ha ancora le frece dei oroloi e i archi (de temp).
Che bel stamatina nar lì con en deot a tor su la resina che pianze dal pim soto casa. E tastarla...come fevo da bocia. Prima che i enventes la saila menta.
E fermarse a parlar de tut e gnent col postin. Che no te vedi mai quando te sei al lavoro.
E domandarse: 'n do sarai ancòi i indiani?
Se ciava, no g'ho miga temp da spetarli... i gavrà qualcos altro da far...