Se gh’è la néf se vóta listess? – Di Cornelio Galas

Se i sèra le scole, sererài anca le sale dove se dovrìa nar a votar? Ensoma, spòstei a n'altro dì le elezióm, come la partia dela Juve?

Osc'ia, basta zinque, forsi dése schèi de néf e l'Itaglia (sì col «gl», perché sém tuti inioranti) soratut en zó, dale bande de Roma, no la gh'en vèi fòra. Gnanca fussa 'l teremot.
O che dal ziél vegna zo pali de fèr. Treni che no parte. O che parte ma ariva l'ora del mai e 'l dì del miga. Scole seràe.
Tuti che dìs de moverse sol se propri se deve.
 
Odìo, se sa che da noi, en montagna, i è pù atrezài. Che no se spèta che la néf la deventa giàz per tirarla via co la pala o butando zo el sal.
Però, no so, me par che se la fa pu gròssa de quel che la è.
Dai che no l'è la prima volta che névega anca en zò. E tut mal no me par che sia metri de nef che ghe vol le turbine.
 
Ancòi ala televisiom drio a quei che parléva de zità stofegàe da la néf ghe fus n'aiòla con zà l'erba vérda.
Per dir neh... Pò se sa, quando gh'è la nef l'è semper gazèri. Bisogna adatarse.
De zerto no nar en giro en bici o co le scarpe che se dropa a nar a balar o co le zavate.
En Trentim da temp da november – che fiòca o no fiòca – su le machine ghe se vol le gome da nef.
E se no le cadene.
 
Anca da noi è suzès robe strane. Come quel che i ha fermà en dì a Paso San Zoàn, a Nach.
Che el neva en qua e 'n la co la so machinota.
«Le gome le è lissie – i ga dìt i vigili – gàlo almen le cadene drio?»
«Zerto che gò le cadene, le è nel bagai de drio.»
«E alora perché no 'l le mete?»
«A mi i m'ha dit che basta averghele drio per no pagar la multa. Del rest no so miga come se le méte le cadene... me darésselo na mam?»
 
Eco, per dir, bisognerìa enzignarse su ste robe.
Che dopo quei co le béne magari no i passa propri dapertùt o i scominzia tardi l'è n'altra questiom.
Ma co le previsiom che i fa en televisiom o anca ala radio che se scolta en machina, dai, te l'embrochi pu dela schedina del balóm no?
Che po' dir che d'inverno pol nevegar e far anca en frét béco l'è come capir (prima) che se te méti i deòti ne l'aqua de la pasta che bòi te te scòti...
 
Ades però som curios de veder quel che suzéde domenega che vei.
Gh'è le eleziom no? De solit se vota nele scòle.
Alora, se gh'è la néf de sti dì, quéla che ha portà a serarle le scole, sererài anca le sale dove se dovrìa nar a votar?
Ensoma, spòstei a n'altro dì le eleziom, come la partia dela Juve?
 
El colmo? Che i ha tacà via anca a parlar de aumento dei prèzi.
Ma per cossa? Per la verdura? Perché la nef l'ha sfondà le sère?
Ah, la foto de sóto l'ho fàta l'alter dì. La nèf fim squasi ai Gazi sora Bolignam.
Me sa che Vel l'è isolada, e anca Ronzo e Bordala da l'altra banda.
Ma no i ha dit gnent ala televisióm, strano... gnanca dei capùssi dela Val de Gresta.