Tirém innànz – Di Cornelio Galas

Stàgo a casa come prima e almém me lavo le mam en bagno sol prima de avèrzer el sachét del pam... cramento

Che strana la vita. Te stài per mesi serà dénter en casa e quando i t'avérze le porte te fài come i orsi 'péna liberài su al Castelér... te te vardi en giro. No te te fidi. Te dìsi da per tì: «'n do èla adès la gàbola?».
Perché en televisiom e sui giornài i sèita tut mal a dir che sto coronavirus no l'è che l'è nà en ferie neh.
Bisogna star atenti. No fàr come quei de Napoli che quando la squadra del balòm l'ha vint la Copa Italia i s'è... molài fòra come prima.
 
Po' ogni dì ghe n'è una de nòve. Uno dei studiài e lezùi (che me domando sèmper: come fai a star sèmper en televisióm se sto virus el dovrìa envéze darghe tant da laoràr nei laboratòri?) che dis che zamai el casìm l'è finì.
N'alter che enveze (varda cosa suzede a Pechino...) sta rogna la pòl vegnir fòra de nof propri quando mem te credi.
Per no parlar dei studi sui vazìni, sule medizine pù giuste, sui numeri che va su e zò dei malài, dei morti, dei guaridi (torno a ripeter: ma i guaridi èi guaridi per semper? E se no i è guaridi per semper perché i dìs che i è guaridi?).
 
Dàmela tòmela chì sém. Co la nòssa cròs da portarne 'ndòs.
Senza savér gnancóra chi ringraziar per sta malediziom che da febrér (forsi anca da prina neh) qualchedùm n'ha tirà.
Ho lèt tut quel se podéva lèzer su sto virus en sti mesi. Bèm, forsi l'era meio se restévo 'gnorànte comeTàco.
Adès gò tante idee en testa. Tute bèm confuse.
 
Na roba però l'ho capìa (ma penso che i l'àbia capìa zamài tuti) e cioé che no gh'è botóni che tegna: quando te ciàpi sto virus qualche més endrìo te podévi restàrghe sèch. Adès tut mal te t'el tègni, te fài l'istéss la quarantèna, ma, così par, i te stà pù drìo dai.
E i te entùba propri se no ghe te la fài pù de tuo. Se ensòma magari te gavévi qualcòs de brut adòs zà da prima. Almem così si spera neh.
 
Lezéndo 'n po' de tut, come disévo prima, ho capì anca che 'l virus no l'è mìga entréch.
Ensòma le scolte alte el deve averle fate perché per esempi l'ha capì che se 'l cópa quel che ghe dà da dormir e da magnar prima o dopo o el cambia albergo o 'l mòre anca lù.
E vot veder alora che che 'l s'è adatà a stàr lì en... mùa, fim quando no se libera en posto da n'altra banda? Vot veder che 'l ciàpa anca lù el bònus vacanza da zinquezento euri per st'istà?
 
Che ve diga? No ne resta che tiràr innànz, nàr envanti con quel che misura la féver gratis: ma quant costerài sti termometri che en do secondi i te dìs quante linee de féver te gài?
Vot meter la comodità rispet a quei che se méte soto bràz e te devi spetàr almen zinque minuti?
 
Per no parlar de le mascherine. Adès no le serve pù a l'avèrta.
Però te devi meterle se ne vài en posti serài. E alora te dévi semper tut mal averghela drìo.
La me sposa la me l'ha dit: tègnela nele scarsèle ensèma a le ciàvi de cà. Però se t'hai tocà le ciàvi te devi anca lavarte le mam prima de meter la mascherina.
E alora en machina gò l'amuchina (quela che è vanzà, se sa). Me làvo le mam, me meto la mascherina.
Pò toco el volante e 'l bigol de le marce. Oscia, dovrìa lavarme de nòf.
Vegno fòra, vago a avèrzer la caséta de la posta. E de nof na spruzada.