El prìm dì de scòla... – Di Cornelio Galas

E, co la scusa dela féver, che non ghe vègna en ment 'n truco che sti ani dropévem quando no se voleva nar a scòla...

Alóra putelòti, la pàchia l'è finìa, domàm se torna a scòla?
Enmagino che saré contenti come na Pàscua e pù de voi i vòssi vèci neh?
Scherzo, se sa. Perché da quel che se léze e se scólta me pàr de capìr che tuti quanti no i sa gnancóra come vegnìrghen fòra.
Anca se l'è da sta primavera che i gavéva temp per atrezàrse, per méterse a ùm.
 
Envéze gh'è scòle che ancora no le gà i banchi... co le roèle, no se capìs bèm la storia dele mascherine, se ghe sarà o mém le mense (ma alora sti bòci dovrài vegnir a cà a magnàr?).
Ma soratut no se sa gnànca se ghe sarà tuti i maestri e i profesori.
Perché tanti par che i sia malài o – meténtela cosìta – no ì su la sùa, ensoma no i se la sente de far come i enfermieri e i dotori nei ospedài.
 
N'altra roba l'è quéla che i dìs da stimàne: dovrìa esser i papà o le màme o le nòne (ensóma quei che ghe stà drìo ai matelòti a cà) a misurarghe ogni matina la féver.
E afàri lòri se el bòcia el gà la féver: el resta a casa e qualchedum magari deve far a mem de nar a laorar.
No se pòl lassàr sole le creature malàe, se sa...
 
E su sta roba m'è vegnù en ment 'n truco che sti ani dropévem quando no se voleva nar a scòla.
Ah, putelòti, no ste farghe lézer ste righe ai vòssi vèci neh, se no casca el palco.
Disévo: na volta quando no se gavéva voia de nar a scòla (magari per via de zerte enterrogaziòm che no ne avrìa trovà preparài) 'sa févem? Tachévem via zà la sera prima a dir che gavévem mal de testa, i sgrìsoi, che ne coléva el nàs (basta meterse nel nàsa do gràni de péver neh).
Ensóma tirévem fòra tuti i màli de 'sta tera fim quando la mama la diséva: «Varda, adés te dàgo n'aspirina, no me par po' che te sèbi conzà sì mal. Domam matina tut mal misurém la féver e po' vedém... ades va soto le cuèrte e zerca de dormìr ah?»
 
La matina dopo quando arivéva el termòmer. Se fèva finta de méterlo soto l'ascèla.
Po' via en bagno a meterlo soto l'aqua broènta per en par de minuti.
Ve pòdo garantir che se néva anca a trentòto e mèz... e che l'unica rogna quel dì sarìa stà quando vegnìva el dotor.
Che a 'n zerto punto el diséva: «Sì, adès l'è nàda zò. Ma per precauzióm mi el tegnerìa a casa almém en par de altri dì...»
Capì come?
 
Se fa per scherzàr se sa. Tut mal da domàm se dovrìa tornar, come disèvo, a scòla.
El come i l'ha scrit anca en zerti libréti e en létere lónghe mandàe ale famée. Che quando te arivi ala fìm te te trovi né fodrà né embastì.
Come quando te lézi quei documenti longhi per semper sula pràivasi. Che po' te firmi senza lézer se no te scade el disco orario del parchegio vizim.
 
N'altra roba che no ho capì l'è anca quela dele elezióm. Che no se fa nele scòle.
Perché a scola se va domam e se vota doménega che vèi.
Mi no so gnancora dove i ne farà nar a votar.
I podrìa magari dropàr quei gazèbi a l'averta dove en sti dì i candidài i dà fòra i santini.
Però, no so, forsi sarìa stà meio nar a scola na stimàna dopo (fénte anca dése dì) e far nar denter um ala volta a votar come se fa nei tabachìni.
Po' na bèla igienizàda... e denter i puteloti. Che magari entant ariva anca i banchi co le roèle no?