Tante ciàcere per gnènt – Di Cornelio Galas

No i sa se ciamar Draghi, che stampéva euri nar che nare, o qualchedun de pù brào, come Toninelli per dir…

No avrìa mai dìt, che en momenti come questi - dove no se sa gnancóra se ghe vegnirém fòra dala maledizióm del covid - ne saréssem persi drìo a béghe dei politizi. Magari per no perder poltrone. O per robàrle a qualchedùm.
Perché, pur lezèndo tuti i dì pù de tre giornai (oltra ala gazèta al bar) pur scoltando squasi tut quel che i dìs en televisióm, me par che no i la conta giusta su sta crisi zo a Roma e soratut su come i volerìa vegnìrghen fòra.
 
Scominziém da Renzi, quel che de colp l'ha tòlt la corènte ala magioranza che tegnìva 'n pè Conte.
A parte 'l fàto che l'èra propri stà lù, el toscàm, a far nàsser quel governo tra zinque stéle e Pd (Renzi tra l'alter el vèi propri dal partito adès comandà da Zingareti, el fradel del comisario Montalbano), no se capìs cossa sia cambià en quei pochi mesi che gh'era anca do ministri de Italia Viva a Palàz Chigi a Roma.
 
Colpa del Ricoveri Fàund? Tut de colp? Perché no i ne aveva mai parlà ensèma? Perché Conte el voléva darghe miliardi ala zitandinanza ativa dei so amizi zinque stele?
Forsi no se 'l savrà mai.
O magari sol quando dovéssa cascar zo tut quant el lezerém el pròssim Nadàl sul solito libro del Bruno Vespa.
 
Fato sta che sia prima che dopo le dimissiom del presidente Giuseppe Conte, me par che 'n po' tuti quanti i dàga l'idea de no capirse. O meio, de no scoltarse entant che i parla, anca e soratut per so cont.
Perché en dì i dìs na roba, el dì dopo tut el contrari.
En dì no i se pòl propri véder, poche ore dopo par che no i pòda star gnanca 'n minut senza saludarse, parlarse, magari anca zenàr ensèma.
 
Eco alora che le delegazióm dei vari grupi (peralter ogni dì ne nàsse um nof che nessum avrìa votà se 'l fùssa stà sui scartabei eletorali a so temp) le và su per le scale del Quirinale, le parla col presidente Matarela, le vèi zo bàs a dir qualcos en ponta de lengua ai giornalisti e po' le parte coi so autini magari anca fasendo na sgasada.
 
Dàmela e tòmela, ala fim è vegnù fòra che – così l'ha dit l'altra sera Matarèla – vist che sém nela merda tra virus, dìte seràe su e casini vari, forsi l'è meio che quei che fim adés ì è stài su a governar i se méta entorno al tàol e i fàga finta de no aver mai begà.
Se no – e per tanti sarìa na disgrazia perder poltrona e soldi tacài soto – se va a votar. E stavolta òcio che de sicur metà i resta a casa e miga sol dale dése de sera ale zinque de matina.
 
Eco alora che i gà dat al presidente dela Camera Fico (e no l'è en caso che tanti giornai i abia subit fat la batùa sula fòia de fich) l'incarico de vardar se se pol riméter ensema i tòchi.
E via de nòf alora co 'ti incontri tra delegazióm. Che vèi da domandarse, cossa poderàle dìr rispet a quel che le ha zà en sti di chì? Che le ha cambià idea? O che le podrìa starghe se i altri i le cambia?
 
E se tuti i stés sule sùe? En quel caso, i dis quei pù lezui e studiai, en fato de politica, de mi, se podrìa nar vers en governo istituzional, magari con Draghi (quel che stampéva – nar che nare – tanti euri dì e nòt quando serviva tanti soldi anca a noi 'taliani) e qualchedum alter che ne capìssa qualcos de pù, meti, de 'n Toninelli, tant per far n'esempi.
 
L'è tut mal na roba che riscia de nar per le longhe. E chi me vèi da darghe en consìlio per nar pù en prèssa.
Envéze che nar su e zo dale scale del Quirinale, dove te devi arivar cola machina, la scorta e compagnia bèla, perchè... no dropàr el compiuter come quando i fa le riuniom coi capi dele regióm?
Tra l'alter fasendo sto tipo de riunióm se podrìa saver subit quel che dìs Caio, Tito, Sempronio, e far anca na discussióm se serve.
E no servirìa pu encontrarse de nof. Se propri no se volés dropar el compiuter basterìa anca farse na telefonada, taiando tuti i tempi morti del su e zo dale scale, e dele sale da sanificar tra na riuniom e l'altra.
Capì come?