Home | Rubriche | Dialetto e Tradizione | El mistér de l'ombrèla e de'l virus – Di Cornelio Galas

El mistér de l'ombrèla e de'l virus – Di Cornelio Galas

Avé mai provà quela roba chi la serve per savér se te gài el covid? E basta do minuti... per restari né fodrài né imbastìi

image

Sóm lì che lézo el giornàl en teràza, che ancòi, dài, gh'è anca 'l sol e no par gnànca véra de fàr a mém de beréta e 'ntabaraménti vari. Ensóma, me sènto en pàze. Che se ciàva tut el rest... Anzi, m'empìzo anca en zigarét valà. No penso a gnènt.
Lèzo sol le ultime pagine, quéle de sport.
Le màm dopo esser stà al tabachìm me l'ho lavàe, se sa. Ho més nel solito cassét la mascherina...
Ah, me sa che domàm devo cambiarla, l'ho sporcàa n'atimìm col café.
Ma per el rèst, che bèl, som stuf de sentir parlàr de covid, vazìni, morti, contagiài, zone rosse, arancióm, giàle e compagnia bèla.
 
Eco, penso, ghe voléva propri en gol su puniziom per far zugàr ancora l'Eriksen ne l'Inter?
E i altri penséri no l'è che i vàga tant lontàm. Sol che ariva la sposa.
La méte zo i sachéti de la spesa e, come se fùssa el me compleam, la me dìs:
«Vàrda cossa ho crompà per ti...».
Vàrdo e l'è na scatoléta. Se capìs da lontàm che la vèi dala farmazìa.
«Cossa èlo? - ghe domando – Le pìrole per la prostata no le ho mìga zamài finìe...»
E éla: «No, sta roba chi la serve per savér se te gài el covid... E basta do minuti, chì a casa, se pòl rangiàrse per so cónt e po' nesùni tut mal saverìa se te gai el virus o mem... Capì come?»
 
«Oscia – ghe digo subit – chisà quant t'è costà sto mistér de l'ombrèla...»
«Ma no – la dìs la spósa – disénte che fém a mém de farne portar a casa la pìza sta stimàna... Dài próvela subit.»
«Cramento – ghe rispondo entànt che avèrzo la scatoléta – sol a vardar le istruzióm me vèi mal de testa. Dài che la próvo dopo disnàr, làsseme finir de lezer el giornal...»
 
Gnènt da far. Entant che som lì per nar de nof en teràza, éla l'ha zà tirà fòra tut l'ambaradam e scartozà tut quant dale so plastiche...
«Toh – la me dìs – no l'è difizile...»
«E alóra – come dìs le istruzióm – vago entant de nof a lavarme le màm. Pò gh'è da cavàrghe 'l stupàl a 'n coso e dopo e no se capìs bém cossa bisogn far de sto stupàl che 'l gà da na banda na specie de capucio come quei bastonzini che se dropa per netàr le recie, per dir. Và bem, el meto denor.»
 
Torno a lèzer le istruziom. No le dìs gnent del stupal, ma del còso restà senza quel: eco, sto agégio de plastica el và més sul dé (mèio dropàr quel dove ghè su la véra da sposài, i dis) e po' se se schiza da na banda (non da quela restàda senza stupàl) vèi fòr n'ùcia che la sbùsa el dé e fa vegnir fòra el sangue.
 
Diaolporco – digo tra mi e mi – e dopo che vèi fòra el sangue devo dropàr alora quel stupàl péna tirà via?
Per no savér né lèzer né scrìver, ghe provo.
Ma 'l sangue no 'l se tàca gnanca se dropo el stupàl come na peneléssa.
En quél la spósa la me dà, tant per cambiàr, del vecio pensionà bacuco.
«Ma dai, el gh'è anca su scrit de dropàr la pipéta per el sangue...!»
«E 'n do èla sta pipéta ?» – domando, entànt che gò zamài tuta la màm ensanguinada.
«L'è lì nela bustina de nàilom, ma sét anca orbo zamài?»
«Ah sì – fago – ma se te me scondi le robe soto la carta dele istruziom, cramento...»
 
Alora svizìno sta pipéta dove gh'é la pipiarèla de sangue fim che el sangue l'ariva – così dis le istruzióm – ala righéta nera.
Ma ocio a no schizar gnent. Bisogna schizàr sol quando se mete el sangue en de 'n bùsatìm su en tochét de plastica. E dopo?
 
No l'è miga finìa. Bisogna tòr fòr semper da la confeziom la bocéta con denter chisà che roba e butar na góza nel busatim... e n'altra góza sol dopo zinque secondi.
Bòm, adés – i dìs – basta spetàr dése minuti. No depù, se no magari va tut a fàrse ciavàr, par de capir.
 
Speténte dése minuti valà. Che demò son agità, m'empìzo en zigarét...
«Smorza subit quel zigarét, no vòi fùm en cosìna... Va 'n teràza semài!» – La dis la spósa.
E alóra penso: nàr fòra a fumar col fòch soto 'l cul per i dése minuti che pàssa no vàl la pena... Meio star chi a vardar l'orolòi.
 
Ale tante vèi fòra na righéta. Una sola, sul tochetìm de plastica. Me vèi en dùbi.
«Tèi – ghe digo ala sposa, – no l'è che i t'àbia dat quei agegi per veder se te sei incinta?»
La me fulmina coi òci. E alora torno a vardar le istruziom.
Co na righéta vol dir che te sei negativo. Ensoma no gh'è anticorpi contro el virus.
O, se ghe n'è, i è massa déboi, pochi. Cossa vol dir?
Vol dir – lèzo – che no ho mài encontrà sto covid per stràa. Però subit dopo i dìs che se dovés averghe féver, tóss, el cori cori, spìza ai òci, meio sarìa dirghelo al me dotor e far altri esami.
 
Come me sento? Nè fodrà né embastì. So tant che prima.
E alora ghe digo ala sposa: «Se no t'avéssi crompà sto mistér de l'ombrèla forsi stasera podévem farne portar do bèle pizze sacramentàifel.

Condividi con: Post on Facebook Facebook Twitter Twitter

Subscribe to comments feed Commenti (0 inviato)

totale: | visualizzati:

Invia il tuo commento comment

Inserisci il codice che vedi sull' immagine:

  • Invia ad un amico Invia ad un amico
  • print Versione stampabile
  • Plain text Versione solo testo

Pensieri, parole, arte

di Daniela Larentis

Parliamone

di Nadia Clementi

Musica e spettacoli

di Sandra Matuella

Psiche e dintorni

di Giuseppe Maiolo

Da una foto una storia

di Maurizio Panizza

Letteratura di genere

di Luciana Grillo

Scenari

di Daniele Bornancin

Dialetto e Tradizione

di Cornelio Galas

Orto e giardino

di Davide Brugna

Gourmet

di Giuseppe Casagrande

Cartoline

di Bruno Lucchi

L'Autonomia ieri e oggi

di Mauro Marcantoni

I miei cammini

di Elena Casagrande