Te ricòrdit de quando... – Di Cornelio Galas

Te ricordit quando se néva a balàr e se ciapéva (o se deva) e pestón? Che bel che l’era…

No so se l'è perché sto deventando vecio o anca per el fato che l'alter dì no ho vist bèm en spìgol (cramento, che bòta en testa) ma me par de esser gualìf a ùm che se ricorda pù dele robe endrìo che de quele tra 'n nàs e la bóca, per dir ensoma de quele pù vizine nel temp.
Per esempi: sula stràa tra me casa e 'l tabachìm a Bolignàm (l'unica che fàgo a l'averta, a pè, tuti i dì) quando encontro qualchedùm che conosso l'è semper tut en «te ricòrdit de quando...?»
 
Oh, no l'è che sia passà sècoi. No se parla de quando névem a l'asilo o ale elementari.
E gnanca de quando se zughéva al balóm sul geróm davanti ala ciésa.
No, a far tant è passà forsi qualche stimàna pù d'àm. E tut mal par de parlar come i veci alpini tornài dala Russia.
O dei nòni che te diséva de tegnìr da cont el pam... che no se sa mai se torna quei ani de fàm, de tanta fàm.
Quando – i me contéva – se metéva en balànza, en méz al tàol, la rénga. E tuti entorno che i la pociéva co 'n tochét de pàm per darghe saor de companàtech.
 
Però, entant che se gà sti ricordi, sul marciapiede de viale Staziom, la vòze l'è squasi gualìva a quela dei nòni.
Tra l'amàr e 'l tòssech. Ma tut a l'incontràri. Perché enveze giust n'àm endrìo la neva meio.
Ve la fago corta. Gavé en ment quando le mascherine i le dropéva sol i dotori a l'ospedàl soratut quando i féva le operazióm?
Eco, alora, se te fussa nà en giro co la mascherina sula boca i t'avrìa dàt de sicur del mat o de um che el gà la spùzza soto el nas (quel che dìs semper barèa, capìrne).
 
E ancora: se na guardia del comum l'avés fàt na multa a dei bòci che stéva magnando en panìm fòra dala botega dove i li fa, la storia la sarìa finìa subit sui giornai e 'n televisiom.
M'emmagino anca el titol: «Vietati gli assembramenti? Siamo tornati all'epoca fascista?».
Per no parlar de altre robe che dopo le è deventàe da delinquenti: nàr fora regióm o adiritura dal Comum dove se abita senza na bona giustificazióm, nar a trovàr i suoceri 'n pù de dói (fato, bisogna dir, che l'ha tut mal risolt en casim che qualchedùni gà en faméa: «perché anca sta doménega dai toi? Sèm zà nài su a trovarli mèrcol, oscia».
 
Eco, l'unica racomdazióm che podrìa restar anca dopo sta rogna del covid, podrìa esser quela de lavarse bem le mam no sol la matina.
Ma per el rest ne par sia, come dìt, dei ricordi lontani, quei dì dove se podéva nar al cine o al teatro. Far avanti e 'ndrìo en zità sol per fàr vegnìr ora de disnàr.
E magari – pensa tì – anca nar a magnàr na pìza la sera dopo esserse rangiài con en tòst e na biréta al bar a mezdì.
Par emposibil anca che na volta se podés nàr a balàr al Fanum dove ghe n'era sìtanti en pista che ogni tant te ciapévi (e te rendévi, se sa) en pestóm.
O nar a sciàr en tra la stimàna perché de sabo e domenéga gh'era massa zènt.
E no dover lèzer i giornai o vardàr la televisiom per saver se el posto dove se abita l'ha cambià... color. Magari dal zàlt a l'aranzóm o al rosso.
Come en semaforo che te dìs se te pòi traversàr la stràa o no.
 
Eco, ero drìo a far sti penséri, quando, davanti al tabachìm, vedo na sióra che me fa dei versi tocandose la boca.
No capìsso... la gònte sporca de la torta de pomi magnàda a colazióm?
La me fa ancora i stessi versi... Diaolporco, ho capì, ho desmentegà la mascherina sul tavolìm dela cosìna...
Me volto e torno endrìo... Sula porta de cà la spósa co la mascherina en màm.
«Chi no gà testa gà gambe...»
L'è per quel che quela matina, stando a quel che dìs la app del telefonim, ho fàt el dopio de passi rispet al solit…