Fà 'sì càlt che... – Di Cornelio Galas

L'è vera che «'l temp, el cùl e i sióri i fa quel che i vòl lóri», ma da àni zamài, s'è capì che l'ànda l'è cambiàda per tuti. En pèzo.

Per parlar del tèmp, no de quel che passa, ma de quel che fa càlt, frét, cosìta, el trentìm el dròpa spéss dei modi de dir.
O meio, na vòlta la néva de proverbi. Tipo: «L'acqua de agóst la renfrésca el bósch».
Opùra: «Se piove de l'Asunzion fén rave e formenton» (rape e mais).
O ancora: «De san Roc le va de scroc» (se tòl su le nosèle, le nocciole).
E no l'èi finìa: «Agost dà saòr al most», «a san Gioachim (20 agosto) gh'è 'l prim freschim», «de agost madura, de setembre se vendema». E gh'en sarìa tanti altri.
 
Questi, tut mal, l'è modi de dir... vèci.
Perché, l'è vera che «'l temp, el cùl e i sióri i fa quel che i vòl lóri», ma da àni zamài, s'è capì che l'ànda l'è cambiàda. En pèzo.
Eco alora che quando fa càlt, fa pù calt del solit, quando piove l'è squasi semper disastri.
Ensóma, se en Sibèria i và en giro senza gnènt endòs l'è tut dir no?
Eco alora che anca quei veci proverbi i è destinai a cambiar. Pù che àlter vèi a mancar – saràlo el nervós per l'àfa? - dei esempi, dele zertéze.
Se parlém del càlt (che dìr “bestia” l'è poch) bisogna alora nàr su altri modi per spiegarse meio.
Provo a scrivérne qualchedum.
 
Fà 'sì calt che...
- Se desméntego la borsa dela spésa sul cofano dela machina, el làt el bóie nela so botiglia e la càrne la devènta léssa.
- Le pétole del nàs le devènta mocìm.
- Le àole del làch de Garda le se trà dirénte ne l'oio broènt pùr de no esser bolìe piam piam ne la so acqua.
- L'ùa su le vigne la devènta polverina zà pronta per far el brulè.
- I órsi del Trentìm (vist tra l'alter che pochi i lì vòl nei nòssi boschi) i se svòltola nel gèss e quando i è bianchi i se tàca a tir che và en su per nar a trovar i so cosìni del Polo.
- El me gàt da dì el sèita a saltàr sula credenza per empizàr el clima.
- Quei che se lamentéva che féva massa frét per star (come se doveva) al de fòra dei bar a bever i spritz, i ha fàt la cóa per el Grin Pass e i s'è messi en lista per la terza dose del vazìm per poder star denter al fresch anca l'istà che vèi.
- El me amico Giani, gran fongaròl, adés quando el và nel bosch el se tòl drìo sal, péver e oio. Perché i fonghi i è zà còti sul posto.
- Le bisèrgole, a forza de ciapàr sto sól, le è deventàde tute nere come i bìssi carbonéri.
- Ho vìst coi me òci en putelòt che l'aveva 'pena crompà en cono gelato. L'ha tirà via el cuerciét de carton de sora e l'ha scominzià a… bever de càna.
- En cagn de quei che ména i òrbi a 'n zerto punto l'è scapà dal so paróm. E 'l gà dìt: “Cramento, capìsso che no te ghe vedi, ma te sentirai che no se pòl nar en giro co sto calt diaolporco”.
- Ho provà a brevàr i fiori. Ma quei i ha scominzià a gosàr: «Fàtela ti na docia calda co sta afa».
 
Ghe domando ala fim al Guido de l'Adigetto.it el permesso per mandar a quel paés quei colèghi de l'Adige che, nel '75 - prim am che lavorevo - no i m'ha dit che a Feragost i giornalisti no i laóra.
E i m'ha lassà al calt, en redazióm, da sol, tut el dì...
 
El Guido l’aconsente e anzi el carga en taglian: «Cari colleghi, questo è il bardotto, quello il mulo, andate tutti a pigliarvelo in…».
Non ricordiamo più l'ultima parola.