Na via o na piàzza al Vasco, perché no? – Di Cornelio Galas

Lù l'è lù e noi no sén en balón – Ciao Vasco, bom concerto. Ciao Fugatti, tanti auguri quando arìva el cónt

Putèi, no sté capirme mal. No la gò su col Vasco Rossi (a so temp savévo tuti i acordi de le so canzóm co la chitara neh) e gnanca col fato che dopo mesi de «caserma rest» se pòda, ale tante, nar a l'averta a scoltàr en so concerto. L'èra ora diaolpòrco.

Pù che alter no capisso (e volerìa tant capìr, som 'gnorante, scuséme, anca se ho fat le scole alte) perché nel contràt de quei che organiza 'sta storia per el màgio che vèi, ghe sia dénter (ma sul serio? O èlo en pès de aprìl?) che a Trent i dovrìa entitolàrghe na via o na piàzza al Vasco.
E darghe anca en premio, tipo che 'n sònte mi, l'aquila de San Venceslao o 'l tòrdo dela Portèla.
Eco, me sa strani che prima ancora de far qualcòs, prima ancora de cantar, qualcheduni el domanda en premio.
Scuséme, ma no gh'envegno fòra.
 
Se po' ghe tachém a sto contràt anca el fato che la Provincia la deve rangiarse coi biglieti che no sarà magari vendùi (che i vanzessa ensóma) e 'l casìm pu gros (méter a posto co le ruspe quei tereni vers Matarèl) pù la questióm che nesuni se faga mal, quela de seràr strade e treni e tut quel che ghe và drìo... bèm, me vèi giust la pèl de galina.
Che ve diga? Mi, a ste domande de quei che laora per el Vasco gavrìa dit sol na parola: «Ciavéve!»
Perché va bem laoràr per far conosser el Trentim, per far vegnir en cantante che da le so bande l'ha fat vegnir squasi mez miliom de persone a scoltarlo.
Ma, cramento, dai, come se dìs: gh'è modo e modo.
 
No me risulta che quando i Pinch Flòid i era nài a Venezia (ohi ném a veder i Pinch Flòid, i cantéva i Pitura Freska) i gàbia entitolà na via, na cale, na piàzza, en campiel, o i gabbia dàt el Leon de Oro.
E gnanca che i abbia fat vegnir le ruspe a Mestre o en piàzza San Marco.
Dopo, se sa, mi som zamài vecio e bacuco. No vago pù al massimo. No fago pù vite spericolade.
E no gh'è a Vignole en Rossi Bar dove nar a bever uischi.
Robe che se féva da zoveni, se sa. Come se sa che i tempi i cambia.
 
N'ho conossù e anca entervistà tanti de cantanti quando i vegniva a Riva per la «Vela d'Oro».
Zent da milioni de dischi vendui. Lì bastéva en palco, quel del Palacongressi (le ruspe le laora ades per sgrandàrlo) e soldi per pagarghe l'albergo a quei (come el Pippo Baudo) che ha lassà alora anca dese milioni de scontrini al Lido.
Però nesuni de quei lì ha mai domandà de averghe na via, na piàzza col so nome vizim al lach.
O en premio... perché lù l'era lù e voi no sé en balón.
 
Bòm, finìa chì. Ciao Vasco, bom concerto.
Ciao Fugatti, tanti auguri quando arìva el cónt.