El librét dai boteghèri – Di Cornelio Galas

La parola, binà tut quel che se dropéva l'era semper gualiva: «Ségneme su, valà»

L'era a quadreti, de solit grandi. Perché anca i veciòti i podés lézer i numeri. Che era suzès dele volte che, scrìti picoi, qualchedùm l'avéva provà a 'mbroiarli.
La parola, binà tut quel che se dropéva l'era semper gualiva: «Ségneme su, valà».
Sol dopo che 'l boteghèr l'aveva segnà se podéva empienìr la spòrtola. E l'era gazèri a casa se vegniva fora che noi bocéti avém segnà qualche ciùnga.
No tornéva i conti, gh'era tant de enterogatòri. Te paséva la voia de segnar anca sol na golia.

Ala fim del més, fènte el vintisète, quando i pu tanti i ciapéva paga, el prim pensér l'era quel de scancelàr quei debiti. Poch o tant qualcòs de quei numeròti, el restéva semper scrit.
Ma i ghe fèva, per ricordarse, en bel segn rosso soto. Che così el déva ne l'ocio, quando se tornéva nele pagine endrìo.
Le vedove, quei che gh'era brusà la casa o fàm mal laorando? Per en mès i seréva anca n'ocio.
L'alter però 'l restéva avèrt su quel che i tolèva. Che la carità la néva bèm, ma miga su tut. E miga per semper.
Tut mal i segnéva anca quéle robe. Che a so temp qualchedum avrìa dovù pagar.
 
L'era 'l temp dela ciocolata vendùa a eti. Na féta sola, su la carta oliada.
E da lì tre tochi: «Varda che gh'è anca to fradèi...»
Al posto dei detersivi la nona la dropéva la zèndro dela fornèla.
E via coi gnòchi de brugne (che bòni co la canèla e 'n ciodo de garofano), che l'aveva emparà a far, da sfolàda, en Boemia.
 
Se robéva uva, pomi, pere quando l'era la stagióm. E zirése ai Mòri (Pratosaiano) zercando de no ciapàr fusilade a sal nel cul.
Poch sora i Gazì gh'era anca i granzóni, le ampomole, le fragolete de montagna. Po' spàresi de mont, stupacùi, melograni, codogni.
Na volta avévem zercà, coi lupoli, de farne anca la bira. Era vegnù fòr na specie de tè amar, tòssech: gnent da far.
Meio le nós, i maroni en costa. Meio le nosèle e fonghi dal sangue da méter sula gradèla, col capèl revers, piém de ài e prezémol.
 
Eco, sti magnari no se doveva segnarli. E nesuni i avrìa mai savù quanti te ne avevi magnà.
E na sera n'erem sentìdi siori, come quei che gavéva la televisiom en casa, che no i dovéva vardar el màik al bar dela Pierina.
El nono l'era arivà con 'n grant scatolom. Piem fim a l'orlo de tanta monéa.
«Deme na mam a contarli pòpi... se fà così.»
Se doveva far i muciéti da zinque, dese, vinti, zinquanta e zento lire.
E tanti casteleti, che così se ripaseva le tabeline, che i finiva tuti a um.
Ala fim - fati do conti - avréssem podù tòrne chisà quante coche cole, budini, torte, na botega entéra.
 
Ma 'l nono 'l n'ha serà subit la gnàpa: «Dai tira fora quele zento lire che t'hai mes en scarsèla.
«Vardé che sti soldi i vèi dala limòsina dela ciesa. I paga così i banchi che gavém fat.
«Ma ades devo pagar vernìs, lavoro dei operai, la benzina del furgom, el legnam e po' anca scancelar robe endrìo dal libret dei botegheri...»
Meio l'era nada quando, per do caréghe e 'n taolim, l'aveva ciapà na colàna de luganeghe.
Anca se per magnarle avem dovù strangossàr: «Le deve sugarse bem zo en cantina. Se no, massa fresche, riscè de gomitar.»