I à més la prima preda per la Busa – Di Cornelio Galas

De solit quando se fa na galeria la prima roba che se fa l'è torla via na prima préa per po' seitar a scavar…

- Scolta, no l'è per savér i to mistéri, ma no t'ho vist su a Nàch stamatina, 'sa gavévit da far per no vegnir a n'aveniment sì gròs?
- Perché,'s'hai fàt su a Nach da dover piantar lì tute le stràze per nar su a vardar?
- Ma tì i lèzit i giornài o vardit sol le figure? Osc'ia stamatìna i metéva zò la prima préa dela galerìa Lopio- Busa, quela che se spéta da trent'ani...
- Ma valà che 'l prim de april l'è zamài pasà neh...
- No l'è 'n schèrz. Gh'era su tuti i politizi... dal Rossi en zò, i sindazi, quei che ha fat el progièto, quei che laorerà...
 
- Ma dài... osc'ia l'unica volta che no me fermo al bar Primavera a lezer i giornai… dele volte ah?
- I gà dàt anca la benedizóm al cantér neh... l'è stà don Franco, de Bolignam, sàt quel che fa le corse en montagna?
- Beh, dai fa piazer, um dela nossa Republica de Vignole almem el gh'era... anca se...
- Anca se cossa?
- Te dirò, no l'è che sta storia la me convinza tant neh.
- Ma alora te sei el solito bastiam contrari. Diaolporco, se i benedìs la prima préa vòl dir che ale tante i tàca via co sti benedeti laori no?

- Eh ma no l'è quéla so màre...-
- En che senso, scuseme, no stà parlarme che l'è per le eleziom... che se vota st'autum en Provinza de Trent neh... e po' l'è da 'n pèz che i ha piantà i scartabèi dei laori...
- No, no l'è quel che no me convinze, l'è sta storia dela préa...
- Oh varda che en tuti i mistéri grandi, tipo scòle, ciése, ospedài... i méte la prima préa propri per far veder che i tàca via a far sul serio... no te volerài miga che i scòmoda el paroco per na roba per finta...
- No, no... l'è anca quel posto lì che ...
- Cosa ghe z'entra el posto ades, sém a San Zoàn, al passo, sora Nach...
 
- Eco, te l'ha dita... vinti metri pù en là i aveva tacà via a far en nof albergo de Passo San Zoan... l'è ani zamai che dopo la prima préa i n'ha més anca altre... po' de colp s'è fermà tut quant.
- Eh ma alora te vòi propri portarghe sfiga a sti laori... deograzias che almem i ha scominzià dai...
- Va bem. Alora zento metri pu en là gh'è el nof zentro comerciale de Nach... fermo anca quel che ghe piove denter perfim...
- Ma sti laori chi no gh'enzola gnanca le scarpe a quei dela galeria dai, l'è robe de privati... se vede che i gà avù qualche rogna coi soldi, so bem tant mi...
 
- A parte che de soliti i privati i è pù svelti del publico....gh'è n'altra roba che no me mete tranquilo.
- Dai sentìnte anca questa...
- I ha encementà la prima préa te me disévi no?
- Sì, la prima préa...
- Eco, de solit quando se fa na galeria la prima roba che se fa l'è torla via na prima préa per po' seitar a scavar. Se però te ghe mèti el cimento e na préa propri al prinzìpi de quel che dovrìa esser 'n bus... te me capìssi bem che te stùpi enveze de sbusar...
 
- Sat cossa te digo Cornelio?
- Dime...-
- Metenteghe na préa sora a sta discussiom valà che devo ancora nar a disnar...