El testament – Di Cornelio Galas

De sòlit l’è mèio farlo prima che dopo. Anca perché dopo no te pòi firmarlo…

De sòlit l’è mèio farlo prima che dopo. Anca perché dopo - diaolporco - no te pòi firmarlo e alóra no ’l val gnent, diséntela tuta. Farlo prima ’l te fà pensar che te podréssi morir magari el dì dopo. O l’istessa sera.
Te vèi ensóma da tocàrte lì giust perché de sòlit se fa così quando te vei quela che i ghe ciàma la pìpa al cul.
E alora féntelo dai ’sto testament.

Entànt, el digo subit, no l’è che penso de lassàr tant a quei che resterà. Parlo de soldi, case, robe en banca che pol frutàr.
Bòm. Parlém del rest.
Gò via dei libri, déle robe scrite, dei documenti, dei fàils nel compiuter che forsi podrìa enteressarghe a qualcheduni.
Oh, toléli fòra dal me Pc (spero che la sposa la sia de luna bona) e fé quel che volé. No gh’è gnent da pagar. Tut agratis.
Altre robe da dir prima de esser més de soto? Massì: se fussa lì che pìolo, pu de là che de qua, scominzié a vardar quel che podrìa tornar comot a qualcheduni.
 
Lassè perder, v’el digo subit, el fegato: massa biciéri. Lassé perder anca i polmoni: massa zigaréti.
El rest però el podrìa nar bem. Osc’ia… sul pancreas no giuro. Sul còr… ma sì dai.
Passénte al rest, al funeral, a l’òbit dai. El so: se te disi gnènte fiori ma opere di bene te devènti subit quel che la gà su con quei che fa le corone.
Se te disi nei necrologi che bisognerìa far oferte ala lega contro i tumori, tuti che i dis: el savevo che el gaveva en cancro por cristo.
 
Se te fai la messa de funeral a Arco enveze che a Vignole, eco che i dis: no’ l’è mai stà dei nossi.
Se te te fai cremar: ma dime ti, pu bel che esser mes de soto co la so bara…
Cossa volé che ve diga: dopo che no ghe sarò pu fé quel che volé.
No sté pianzer demò. Vedrìa enveze na gran festa. Biraze, vim per tuti, rugantàe da magnar.
Per dir, tra ’n rut e l’alter: «Cornelio, um en mem stasera che beve e zàca».