El trentìn e l’ùltim de l’am – Di Cornelio Galas

Dai, mòlete fòr. Conosso en posto dove i fa anca a l’ultim de l’am musica de 'sti ani:Equipe 84, Dik Dik, Nomadi, Cugini di Campagna a manetta…

(In piazza, il 29 dicembre)
- Ciao, madòna l’è ’n pèz che no te vedo. Ma te trovo bèm… Te pàri ’n zovenòt. Ma, dìme, dai, la t’ha mès a dieta la sposa… La t’ha serà col marlòs el frigo… ah ah ah ah! Senò te gh’ai qualche bruta malatia… No t’ho mai vist sì màgher…
- Ma e farse en piatìm de afàri soi?
- Ma dai che se scherza… Per el rest tuti bèm, tuti for dal lèt? Passà bem el Nadàl?

- Tasi valà che gh’ò ancora me digo vinti féte de panetòm che fa el levà ’n del stòmech… Lassénte po’ perder le scoréze che sa de spumante…
- Ma bisogna savèr bèver drio le feste. Se sa che el spumante brut... Lo dìs la parola neh… El fa mal
- Ah perché l’è meio quel de pomi, dólz, che co ’l panetòm el fa la pàlta…
- Ma no, l’è che tuti a le feste i bève quele botiglie che costa, che fa le bòle picole… e dopo ‘ste bòle le finìss nel stomèch… semplizòm.
 
- Va bem, ma se no te fai en cin cin almèn a Nadàl …-
- E l’è propri quel che te frega. Tegnirse a um bisogna. Dopo l’è del bao che te te lamenti, che te vaghi en farmacia a tòr l’antonét, el malossinux, no serve a gnènt tacarse al bioscalìm… no t’arivi en zima…
- Bom, dai, dime, ’sa fè st’am a l’ultim de l’am?
- Vàra, squasi starìa a cà co la spósa. El bocia l’è nà en Germania coi so amìzi, i me suoceri i và a balàr a Mèzlombàrd, darghe sesanta euri per po’ star lì encoconà tuta la sera… e anca la matina dopo…
 
- Eh però dai, l’ùltim de l’am el vei na volta sola …
- E meno male. Meti che ’l vegnìs do-tre volte a l’am…
- Ma se se divèrte, do salti, i fòghi, el codeghìn…
- Sì, e el dì dopo el brodo de galina e pasta en bianco… no no…
- Ma podrìa anca esser l’ultim san silvester che se fa…
- Ooh, devo tocàrme? Ma bàsete el cul valà…
 
- Vara che fin che ghe sèn bisogna darse da far, zacàrla sta vita. No te me dirài miga che te stài lì fin mezanòt a veder quei sfigài en televisiom che fa la conta… Magàri co ’na bozza de mineral?
- Ma nò, oscia, l’è che, ’sa vòt, sem zamai vecioti, no me piàs pu i casini, butar via i soldi per gnent… Ma te ricordit quando l’ultim de l’am fèven le scomese a quel che sarìa riussì a far el giro dela Busa en retro cola zinquezènto?
- Sì, e me ricordo anca el cont che avèm pagà ensema, co la colèta, al carozièr…
- Dai che però l’era emoziom…
- Elamadona che emoziòm … anca quando te ghe fèvi el filo all’Apres Club a quela francesina… e che dopo è arivà el so moròs alt do metri e larch quatro…
 
- Massì però se se divertiva de pu dai…
- Come no… coi slavadenti che t’hai ciapà quela sera t’hai dovù cambiar la foto dela carta d’identità e dela patente… no te te somigliévi pù.
- Ma l’era tut mal pu bel…
- Dai, mòlete fòr. Conosso en posto dove i fa anca a l’ultim de l’am musica dei nossi ani. Equipe 84, Dik Dik, Nomadi, Cugini di Campagna a manetta…
- Gh’ò la seconda spòsa zovena…
- Ma varda che i mete su anca Gianni Morandi, Renato Zero, altri vegnui dopo neh…