El trentin a l’università dela terza età – Di Cornelio Galas

Come dela terza età? Ah no so alora… Eh mi me son fermà ala seconda...

(Al bar, con l’amico)
- Scolta, ma perché no te vegni anca ti ai corsi per i veci… Enveze che star semper lì enmucià davanti ala televisiom… vara che i dis robe istrutive sat…
- Ma te poi enmaginàr… Mi no ho gnanca finì le medie, voia de studiar salteme ados, po’ subit en cartèra… a far le not… No te vorai miga che me meta a davèrzer libri adès che tra l’alter no ghe vedo gnanca pu…
- Ma no, vara che ghè na signorina che te spiega robe enteressanti… Po’ no l’è miga che i t’enterroga neh, tel fai per ti… Po’ se va ’n giro col pullman a veder i posti che ghè su le figure dei libri o nei cine che i te fa veder… eh se zaca anca qualcos, se stà en compagnia… Dai vei anca ti…
 
- Ma cossa te spiéghei po’ de precìs…?
- Presempi, vèndro pasà, ah vara l’è stà propri bel. La signorina la n’ha spiegà come i féva a far le palafite…
- Oscia, se te me domandevi a mi te ’l fevo anca veder… Pal de fer, do bei busi nela pacieca, zò i so bei bali, magari darghe su anca el pàiz prima che no i smarziza…
- Te sei propri en semplizon… Te buti semper tut en vaca. Vara che entant alora no i gaveva miga i atrézi e i prodoti de adès per far su le case, le getade de cimento… Te dovevi sentir che strusiàde… Po’… Semper roba cruda fim che no i ha enventà el foch…
 
- Va bem, ma cosa te serve saver ste robe se zamai te sei vecio… O magari gat en ment de far na palafita su per Laghel…
- Beh, tutmal, la n’ha spiegà anca de quei che era nà a abitar su sora Riva, su per Campi… che ghè ancora i mureti de alora neh…
- Sì, tanti balòti che stà ensèma co ’n spuàz…
- E anca quel che resta de Castìl su ’n Vèl…
- Tra sgrèbeni che no te ghe la fai gnanca a nar al vers… Posti che no è boni gnanca per fonghi, gnanca per i sparesi de mont dai… No vei for gnent.
 
- Alora cossa vot che te diga, stà a cà a vardar la televisión, mòlete fora no, che l’è sèmper mèio che encoconarse su ’n canapè dopo zena…
- Ma mi me smono a star lì a sentir ’ste profesorese… Che po’ le parla ’n taliàm, no ghe capisso gnent de zerti nomi.
- Vara che la signorina se te voi la te spiega piam se no te capissi neh…
- Va bem ma te disévi che dopo i và anca a far gite?
- Zerto che se va ’n giro. Così te vedi le robe dal vif, quele che la t’ha spiegà no…
- Eh ma oscia n’altra sólfa alóra…
 
- Ma ’ntant te fai do passòti, te ciapi aria bona, te pòdi portar anca la to sposa, to neói se te voi…
- Ghè tant da caminar? No, sat, perché co le me gambe sifoline… Po’ devo tor zo le pirole per la presióm alta…
- Ma no, i ne porta lì vizim co la coriera…
- E per magnar e bever?
- Ah se và ’n zèrti posti caro… Pensa che l’ultima volta sem stai po’ lì mi e ’Berto con altri dói a zugar ala mora fim quando la coriera l’è vegnua de volta… Bel.
 
- E come se ciamela sta scola, ste robe dela sera?
- Oscia, l’è l’università dela terza età…
- Come dela terza?
- Sì, quéla che vèi dopo le prime dóe dai…
- Ah no so alora…
- Perché, ’sa gat che no te podi…
- Eh mi me son fermà ala seconda
- Ma se sem coscriti, cossa disit su…
- Sì ma ti te sei nà envanti, mi i m’ha bocià en seconda media.