Quando zugheva ’l Giorgio – Di Cornelio Galas

«El se passa la bala su que l’altro pè... E così el ne scarta altri doi... El buta el balóm da na banda e lu el gira da l’altra... N’altro defensor l'è restà su le perséche...»

Da bòcia no l’era semper possibil nàr via, al bar dela Pierina, a vardar quel poch che i féva veder de le partìe del balóm.
I zugadóri se i conosséva sol per la faciòta picola che gh’era su le figurine Panini.
El rèst se podéva zamai enmaginarlo. Da quel che diséva i pu grandi.
El rest se podeva zercar de farlo squasi gualif a forza de peàe contro i muri de l’oratòri o zercando de no farse màl su la bilanza de fer propri davanti a la ciésa de Bolignam.
Po’ piam piam – vist che s’era n’atimìm cressudi, i te lasséva nar zo en via Pomèri, a Arco, dove l’Olivo l’era ’n squadróm arivà ala serie D (e lassénte star perché po’ l’ha pers, secondo mì aposta, col Pordenon, propri quela volta che ghe sarìa basta en pont per nar en C …), piem de campioni che quando i diséva zó i nomi da l’altoparlante per noi l’era come se i lezésa la formaziom del Real Madrid.
 
Bottoni en porta, per dir, en Marco Donegani zovenòt, el «Taba» Bertamini da Bolignam che praticamente l’era come nàr contro ’n mur. Anca se no te gavévi la bala tra i pèi. Marcatura a zona e a om nel stess temp, per dir.
E po’ el prim Arisi, i Lorenzi, I Cesari, «Mimì» Danese, quel che vegniva tut bel petenà, e ancora co la tuta da sci endòss perché la matina l’era nà a ciapàr el sol en Polsa.
Po’ ancora el Sergio Fatorèl, magro empicà, tut scati nervosi che no se savéva pù en do che l’era…  El Zambotti che ’pena en campo el se metéva na margherita en boca squasi per tor per giro quei che lo marchéva.
L’Ivan Maino, el Valerio Bonora… el Rigo oh, tuti noi me ricordo osc’ia.
Ma pù de tuti – e da alora per semper – mi ero ennamorà del Giorgio Luteroti da Riva. Quel che so papà el gavéva en tabachim zo en viale Dante, vizim al cinema Roma.
E che fim a miga tanti ani fa el néva en giro anca lu con quela vecia bici nera dai manubri de sti ani.
 
Bem, el Giorgio – che po’ l’è stà ala Benacense del pòr Enzo Lotti, al Trent, al Vicenza de Bigon – i lo diséva tuti neh, alóra sarìa sta un che en serie A l’avrìa fat la so bela figura. Perché? Ve ‘l spiego subit.
Alora: ariva na bala de quele alte (alte che se le veda i diséva semper i alenadori…), bem, el Giorgio no ’l fa na piega. El gà zà el pè de piàt giust per ’n stop per aria.
El se passa la bala su que l’altro pè. E così el n’ha zà scartà doi de quei altri.
El buta el balóm da na banda e lu el gira da l’altra. N’altro defensor che è restà su le perséche.
Po ’l se ferma, l’alza la testa n’atimim, sol per misurar i zentimetri. E parte en cross che a que l’alter en area basta star ‘n do che l’è per tocar la bala e meterla denter.

No l’è finìa. Perché quei altri adés i lo marca en dése (e pecà che ‘l portier el deva star en porta se no…).
Tuti adòs al Giorgio. Che come se ’ stéss zugando per so cont el gira de qua e de là, l’alza el balom drio la schena e ’l lo fa cascar da na banda, ’l lo tol su de nof e col tach el lo porta da n’altra banda ancora.
E quei altri drìo come le pégore. De colp eco che ’l balom el vei fora da quela selva de gambe.
E, cramento, un de la Benacense el se trova sol davanti al portiér, anzor pu vizim de quando se bate i rigori. Gol.
E quando ariva quei che doveva marcarlo e che envéze i era ancora entorno al Giorgio… el balóm i l’ha zà portà al centro. Per tacàr via de nof…
 
Ah, ’l Giorgio. Quando ala Benacense è arivà anca el Walter Daldosso (Sandokan) no ghe n’è stà pù per nessuni.
E difati tanti i paghéva ‘l biliét sol per quei doi. Quando ho scominzià a scriver sui giornài de sport no ve digo che bel che l’è stà la prima volta che ho podù farghe na domanda dopo partìa al Giorgio, strenzerghe la man.
No me paréva gnanca vera. Gnanca adéss che son en pensiom e le partìe no le vardo gnanca pu en televisiom.
 
Desmenteghévo: na volta al Campagnola, zéna dela Benacense, col pòr Enzo Lotti, el por Athos Planchestainer, el pòr Bonvecchio che curéva i zoveni.
No se sa chi ha tacà via per prim a tirarse carte de grissini e po’ tochétini de pam e po’ quel che capitéva a tiro… fim a gavetòni de aqua minerale.
El Giorgio, da soto el tàol el me fa: «Cornelio, pòrteme qualcòs da la cosina che ho finì le cartucie».
 
El Giorgio (l’è quel co’ la barba, a destra) quando ’l zughéva nel Trènt.