Pronti per Santa Lùzia? – Di Cornelio Galas

La sera prima, fora dala finestra, o sul terazìm, o davanti a la porta, se metéva en piàt grant piem de sàl gròs. Per l'asenèl...

Pronti per Santa Lùzia? Per la féra de Trènt? Per crompàr zugàtoi ai bòci?
Me sa che diré de sì tant per dir. Perché no l'è propri vera. Perché Santa Lùzia adès no l'è quela de 'sti ani, così come Nadal e altre feste.
Dove s'è ciapài pù da altre robe che da le tradizióm, zamài restàe empolveràe, desmentegàe, o forsi sol endrìo rispèt a altre robe nàde pu envanti.

Che ve diga, sarò vecio bacùco, ma a mi la Santa Lùzia dei me tempi la me piaséva de pù.
Così come ghe som restà mal quela volta che um a scòla el m'ha dit: «Vara che Babo Nadal no 'l gh'è, l'è i tòi che mete i regài soto l'alber...».
Se scominziéva la matina del trédese dizember. 'Pena fat colaziom. Prima de nar a scola, a l'asilo, al nido.
Fora dala finestra, o sul terazìm, o davanti a la porta, se metéva en piat grant (pu grant l'era de pu se podeva ciapàr) piem de sàl gròs.
El sàl l'era per l'asenèl dela Santa, se sa. Perché – i ne diseva – l'asenel el và mat per el sal gros. No quel fim...
E noi lì a pensar a st'àsem picolìm che el momoléva sto saà en boca... Come na specie de cica.
 
Po' ala sera, subit dopo Caroselo, bisogneva nar tuti a paiom, a dormir ensoma. E sconderse bem soto linzòi e cuerte, anca soto el cosim se no basteva. Perché no se podéva vardar l'asenèl e la Santa se no se sarìa deventài orbi, propri come Santa Luzia.
E alora tuti 'n del let. Tuti bem scondùi e atenti al ciàs dal de fora. Perché dopo 'n po' tachéva via el casim dei campanèi e de rumori strani: quei de le famose stròzeghe.
Ma alora no 'l savévem quei che féva quei casini for de cà.
No savévem che anca noi, pu grandi, avréssem ciapà na cordesèla e mès en bina baràtoi de fasòi e pomodori per po' tirarli co la biciclete.
 
Se era lì, squasi senza aria, soto le cuèrte, col cor che batéva forte a ogni stròzega che paséva, a ogni scampanelament. Fim quando ale tante se s'endromenzéva e vegniva de nof el sol dala finestra dela cameréta.
Po' se néva de corsa vers la finestra, la porta, el terazìm: el piat col sàl gròs l'era net come 'n pom.
Voleva dir che l'asenèl l'aveva magnà (de gusto) el sal gros.
Ma... e i regai de Santa Luzia? Se scominziéva a vardar dapertut. Dent e for de cà. Dapertut, anca drio le tende.
E ala fim...eco, eco, el scartòz da avèrzer. Denter gh'era fighi sechi, mandarini, ciocolatini... Perfim fritèle (frede) de pomi, caramele. Na festa.
Che però dele volte (quando en faméa de boci ghe n'era pu de um) le finiva co le beghe su come spartir tanta grazia de Dio.
 
Gh'era anca – per dir – el risc'io de ciapàr el carbòm se no se aveva fat i bravi. E dele volte l'ariveva per dassém.
Sol che Santa Luzia ala fim fim l'era anca na bona dona. Ariveva sì el carbòm... ma l'era de zucher. Dur per i denti, ma pur sèmper de zucher.
Prové ades a Santa Luzia a farghe arivar sol mandarini e fighi sechi... Sèmper che i boci i ghe creda ancora a la storia de l'asenèl podrésse trovar voi el carbóm. Ma quel vero. E… 'n testa.