Ma quei guarìdi... èi propri guarìdi del tùt? – Di Cornelio Galas

Quando la finirà sta bruta storia, basterà vardar i giornai veci per capir quante monàe è stà scrit, fàt, dìt (esclusi i presenti, se sa…)

Me sa che a forza de lézer e sentir numeri stém nàndo fòr de testa anca noi.
E tra l'alter no se pòl gnanca pù zugar al lòto, cramento. Ma calma e gèss.
Scominziém da quei che i dìs che i è guarìdi. Cossa vol dir? Che i gavéva el coronavirus e adès no i lo gà pù? E soratùt che no i podrà pù ciaparlo de nòf?
E alóra no i podrà pù darghe enfezióm ai altri?
 
L'alter dì quei studiài e lezùi che ogni dì ne dìs come la va, i n'ha spiegà che i tacherà via a vardar el sangue.
Per capir se qualchedùm magari l'ha svilupà per so cont i anticorpi.
Cioè l'è deventà, magari anca senza saverlo, um che sto virus maledéto no 'l lo ciaperà pù, gnanca se el doves nar en giro senza mascherina o guanti en de ’na casa de riposo dove i è pieni de malài de sto mal.
 
Oscia, sarìa bel se sto sistema el funzionés.
Pecà che i dis che l'è n'esperimento. Che no se sa ancora el perché e el percóme.
Tut mal meio che gnènt...
Gò l'impressiom difati che se vaga envanti a sbalzi. Al stròf.
Prima el decreto che ne ferma tuti fim al tre de april. Po' fim a Pasquéta.
Po' al Borrelli ghe scàpa la data del sédese màgio.
Forse faréssen prima a dir la verità: sta chì l'è na rogna che la narà envanti per mesi.
Così ne metém tuti el còr en pàze.
 
Torno a parlar de le mascherine. Non perché sia deventà en maniaco de sti tòchi de garza su boca e nàs.
Ma perché – e né a veder quel che scrivevo en més fa – sol adès vei fòra che le serve anca a quei che no gà sto virus.
Pecà che le è finìde. E alora come fat a dir che l'è obligatòri méterle se te vai en giro se de cólp par che trovar ’na mascherina sia deventà come trovar brise fora stagióm e nel garàs?
 
M'è piasù po' quel che ha dit el sindaco de Napoli a proposit de tanta zent en giro en quela zità:
«L'è perché gavém le vie stréte e la zent se la vede de pù.»
Oscia, me domando, ma alóra nei càlli de Venezia dovrìa esser la istessa roba no? E perché envéze quéle le è voide adès?
 
De na roba tut mal, tra tante encerteze, som sicur. Quando finirà sta bruta storia basterà vardar i giornai veci per capir quante monàe è stà scrit, fàt, dìt (esclusi i presenti, se sa…).
No so, ma qualcòs me dis che per tant temp noi resterem a casa.
Ma dopo tanti polìtizi e esperti a casa i dovrà tornàrghe. Se no altro per no far veder la facia rossa dala vergogna.
Sempre che i se ne renda cont.
 
Sarà dura tornar en televisiom a dir: «Ah ma mi no pensevo che sarìa vegnù fora na roba del genere».
E ancor pù dura sarà far finta de gnènt de zèrte paiazàde en televisióm o sul balcom de casa.
Che dirve de pù, se non che de solit quando l'aqua la toca el cul se empara de solit a noàr.
L’è che dei bagnini de adès però me fido pòch...