Home | Rubriche | Dialetto e Tradizione | Chi èlo che l'avrìa mai dit ah? – Di Cornelio Galas

Chi èlo che l'avrìa mai dit ah? – Di Cornelio Galas

Gnanca el mago da Nago me sa che sta roba no l'avrìa embrocàda...

image

Se l'am passà, de sto tèmp, qualche «mago da Nago» l'avés dit che da lì a dódese mesi avréssem prest strangosà de poder nar for de casa, anca co na mascherina sora nàs e boca, pur de nar... de sicur qualchedum gavrìa rispost: «Bévi de mem valà che zà te stravàsi».
E 'nvéze sem propri en quele condizióm... fòr de testa.
Che zamài avréssem pensà.

No vedém l'ora che vègna sto benedeto disdòto de magio per poder nar en giro senza averghe drìo tochi de carta (tra l'alter miga vèci, ma semper agiornài) che fim adès serviva se te ferméva i vigili, la polizia, i carabinieri e perfìm pompieri e guardaboschi.
Poderém nàr perfim a magnar qualcòs al ristorante, nar a bever en cafè al bar, dal barbér, a crompàr quel che volém anca fòra del Comum (ma no fòra regiom, per dir no a Affi o a l'Ikea vizim a Brescia neh).
E i ha scortà anca nei ristoranti i metri tra um e l'alter: no dói, en basta um.
Ah, le mascherine! Quéle le se ghe vòl sèmper. E par che quele da zinquanta centesimi (pù Iva se sa) le stàga per saltar fòr ala fim. E 'n vanzerà de zerto quando finirà sta rogna.
Magari i te le tirerà drìo come omagio se te crompi qualcòs de pù de farina, zucher e scatolete al supermercato.
 
Ensóma, dai e dai, par che la vaga meio. Sèmper che sto virus no 'l riciàpa forza perché se no i ha zà dit che se torna ale vecie maniere, magari de nòf tuti serài en casa.
Sperénte de no. Anca perché gh'è tuta n'economia che deve tirarse su.
Um che abita sora casa mia el m'ha domanda peràlter se l'èi vera che coi famosi ecobònus se poderìa sistemar na volta per tute la faciada de la casa senza meterghe gnanca n'euro, anzi, ciapando el dese per zento en pu endrìo.
Lù l'è sicur enfàti de aver lèt che te pòdi scaricarghe tut ala impresa che farìa i lavori.
Ensoma ti te me sistemi la faciada e i soldi (anca quei en pù) te li dà lo Stato. E mi al massimo tiro fòra na botiglia de vim per i operai quando è finì i lavori. Per la ganzèga.
Saràlo cosìta? No so. Sula norma gh'è scrit che se vòl tutmal el bonifico parlante. Mi de bonifici che parla finora no ne ho mai encontrài. No volerìa che fùssa la solita gàbola che te ciava.
 
Gh'è n'altra roba che no me convinze. Se ném en giro senza autocertificazióm come fài a savér che no som positivo, che no som en quarantena; ensoma che no som um che poderìa, mascherina o senza, portar en giro la malatia?
«Ah stà sicur che te sei nei elenchi – me dis n'amico – come quei che i bèca co la patente scadùa.»
Sarà, ma me par che se vaga dal miga al massa. O viceversa, dipende da come te vedi el tài del prà.
 
Tut mal ne ricorderem de sti do mesi e passa. Avém capì che no serve po' far chisà quanta spesa per meter ensema la colaziom col disnar e la zena.
Che lavarse le mam po' no l'è che 'l faga mal, l'è anca en modo per sentirse... a posto.
Avém capì anca che de domenega forsi l'è meio nar a farse do passi che engiomarse nei supermercai.
E che l'è inutile che gavénte en terazòm se no ne metém lì sul sdraio a lézerne en libro o a farne ninàr dal vent.
 
Dàmela e tòmela vèi squasi da dir che nàr for de casa per spender soldi, che tra l'alter no gavém pù, no l'è che sia tant meio che star a cà a digerir en santa paze en piat de strangolapreti fati dala suocera.
Oh, se far per dir, neh.
Ma ve dirò che squasi squasi me stevo abituando, ensóma avévo ciapà el lechét come se dis… anca a farme portar ogni tant la pizza a cà, senza tòr su la machina, parchegiar, fàr la coa e rivar a casa co la pizza zamài freda patòca.
Anca el mago da Nago me sa che sta roba no l'avrìa embrocàda.

Condividi con: Post on Facebook Facebook Twitter Twitter

Subscribe to comments feed Commenti (0 inviato)

totale: | visualizzati:

Invia il tuo commento comment

Inserisci il codice che vedi sull' immagine:

  • Invia ad un amico Invia ad un amico
  • print Versione stampabile
  • Plain text Versione solo testo

Pensieri, parole, arte

di Daniela Larentis

Parliamone

di Nadia Clementi

Musica e spettacoli

di Sandra Matuella

Psiche e dintorni

di Giuseppe Maiolo

Da una foto una storia

di Maurizio Panizza

Letteratura di genere

di Luciana Grillo

Scenari

di Daniele Bornancin

Dialetto e Tradizione

di Cornelio Galas

Orto e giardino

di Davide Brugna

Gourmet

di Giuseppe Casagrande

Cartoline

di Bruno Lucchi

L'Autonomia ieri e oggi

di Mauro Marcantoni

I miei cammini

di Elena Casagrande