Sóm stùf de seitàr a parlàr sol de 'sto virus – Di Cornelio Galas

Gh'è qualchedum che gà bisogn de guanti e mascherine? Féme na telefonada ore pasti... ne metém d'acordi

Ma ve rendé cont che da mesi zamài no fém alter che parlar sèmper dele istésse robe? Tamponi, mascherine, test sierologici, numeri de morti, de guaridi, de contagiài, de quei che è en terapia intensiva (a proposit: èi calai perché tuti quei entubài i è guaridi o perché tanti de lori i ha finì de patir?), de guanti che no se trova gnanca a pagarli oro, de amuchina, de R con zero (che vèi fòra po' che en Trentim no l'era propri così zero), de carabinieri che va nele case de riposo, de reagenti che manca, de test che se te propri te vòi te paghi dai quaranta ai otanta euri... ensóma, de questo no fém alter che parlar da mesi.
Come se no ghe fùssa alter che val la pena per ciacolàr... se sa, almem a 'n metro lontàm.
 
E po' la fase dó (gh'era anca la fase ùm? Quando èla stàda? Prima del contagià zero? E prima del zèro no gh'era gnent?) adés se pensa ala fase tré... quando gavrém el motor a quatro fasi forsi se pol ripartir come prima? O elo meio en do tempi come la vecia moto Galéto?
No, no gh'envegnìm gnancór fòra. Perché, come i dis anca en televsiom, no bisogna sbassàr la guardia. Che se l'è en corazzér de qualcos te poi anca sbassarlo ma se l'è um sul metro e zinquanta scars che ghe tende ale banche de not perché l'ha ciapà quel laòr grazie a so zio 'ndo scominzìt a sbassarlo che la pistola zamài la toca tera?
 
Tut mal sém ancora chi a parlar de ste robe. Anca se soto soto no vedém l'ora che qualchedum el diga che l'è ora... l'è ora de finiamola diaolporco.
Sol che sto qualchedùm no 'l gh'è gnancora. Anzi, i se trà envanti: «Vedré che st'autum no se capirà pù quel che gà el virus e quel che gà la solita fever de stagiom. Ste’ atenti a star tacài che se no la và a finir mal. Va bém nar en giro ma no màssa.»
 
Po' quei che te varda stòrt se – da lontàm neh – te tegni bàssa la mascherina. I te spèta... i te cura.
E che bel, come 'n de'n duèl uestern, arivar a zinque metri e zàchete, tirarla su nas e boca la mascherina nera 'pena comprada al tabachìm.
E po' robàr al Poli i guanti de plastica che na volta se dropéva sol per tor el pam. E schizàrghe denter almén mèz eto de amuchina da portar a casa al posto del saòm.
 
No, basta, ma ve rendé cont che no fém che parlar dele solite robe da mesi... Basta, parlém de alter.
Del balòm per esempi. Ah no che anca lì no se sa come la narà a finir... zerto che dover tornar zo dala D per el Levico, senza poder difenderse fim ala fim...
 
Lassém star el balòm, parlem de politica... la Segnana che no la risponde a Report. La gà resóm oscia, no bisogna pu parlar de le solite robe, basta, parlém de alter.
Per esempi... per esempi... ma elo vera che da domam no serve pù le mascherine en Trentim a l'averta? Cramento, propri quando eri riussì a trovar en stok da dese a zinquanta zentesimi l'una.
Ah, gh'è qualchedum che gà bisogn de guanti e mascherine?
Féme na telefonada ore pasti... ne metém d'acordi.