Ma lù... èlo magari en terorista? – Di Cornelio Galas

«Scuséme neh, ma se fussa en terorista, vegnirìa a dìrvel? E se enveze che terorista fussa en mafiós che vòl sol svoltolar soldi? Ah, càvoi soi, se ciàva»

Prima de 'rivàr al gróp de 'sta storia (vera neh, no na monàda) v'en conto n'altra, vecia, prima che – oh sóm pensionà bacuco zamài – me desméntega.
Quando me sóm sposà la prima volta (eh sì... no m'è bastà 'na volta) l'alora paroco de Laives el' n'aveva ciamà nei só ufizi.
«Ci sono delle formalità burocratiche da sbrigare.» – L'aveva dìt mèz en todésch e mèz en 'taliàm.
Alora se và denter – um ala volta – en sto ufizi vizìm ala sagrestìa.
Gh'era tante domande. E bisognéva scriver le risposte. En po' come quando se fa i esami per la patente, per dir: Come te te ciàmi. Dove abiti. Cossa te fài de laór.
 
Po' però le domande le deventéva, come dir, pù stàifele tant per dirla ala todesca.
Sto paroco l'ha scominzià a domandarme da quant temp conosévo la me morosa, sì ensoma, la dona che volevo sposàr.
Po' perché volevo sposarme vist che alora ero anca zóvem.
Po' ancora se gavévo magari casini en giro tipo denunce per qualcos de brut fat.
Po' se ero per caso recióm, se credevo che ghe fussa qualcos dopo morti...
Bem. A 'n zerto punto vèi fòra n'altra domanda che m'aveva lassà, lì per lì, en po' stordì: «Lei è iscritto al partito comunista italiano?»
 
«Cramento – m'ero dit da per mi en quel moment – vòt veder che per sposar la fiòla de 'n todesch de l'Alto Adige te devi dìr che te piàs el Los von Rom el Los von Trient e magari tirar fòra la tèsera dela es-fàu-pé?»
Tut mal ero riussì a vegnirgh'en fòra da quel'enterogatòri.
Soratut, prima che vegnis el turno de la me prima sposa, gavévo dìt sotovóze: «Oh, ne conossém da pù de n'àm neh. E mi a Bolignàm ho fat anca el zeregòt, me racomando».
 
Prima de sposarme ero stà, soto nàja, a Dobiaco (coi muli), a Monguelfo, a Bresanóm.
E 'n sto ultim posto (a Bresanóm) dopo na polmonite ciapàda a far le guardie de nòt, i m'aveva més en de n'ufìzi dove vegnìva tute le carte de... l'oaio.
No sté domandarme cossa vol dir «oaio». Podo sol dirve che lì ariveva robe su tuti quei che vegnìva a far la naja.
E su sti tòchi de carta – mandài dai carabinieri – gh'era su se quel putèl l'aveva magari fat gazèri en piàza, se que l'alter l'aveva robà, dat pugni o fat tutmal altri casini.
 
Ensóma i te féva na specie de «lastra». No dei polmoni ma dei to comportamenti. De quel che te gavévi en testa, che te scrivevi, che te disévi no sol da per ti, se sa.
No ve digo quante monàe gh'era su sti fòi (fonogrami i ghe ciaméva) che tra l'alter noi, zóveni alpini, dovévem ribàter su altri fòi. E quindi lézer, vardàr... scuriosàr, se sa.
Schizém adès el tasto del temp e 'rivém ai tempi de adès. Quando te devi firmar na fila de carte per quela che - come ghe ciàmei? - l'è la pràivasi.
Dove - a mi me càpita spéss - anche per nar dénter el to compiuter te devi avérghe 'n ment le passwuord, i codici, i numeréti.
 
Bòm. L'alter dì sóm nà en banca (no ve digo quala se no magari i tòl via i soldi dal cont) per domandar soldi 'n prest.
Gò dele robe da far. Dove l'è pù quel che serve per farle de quel che gò sul me cont.
Nessun problema. Vago lì. E i tàca via con quel che i ghe ciàma questionari.
Anca chi, come te ciami, dove te abiti, cossa te fai (pensionà, oscia, vardé chì el cartelìm), se te gài na casa tóa, se la sposa la ciàpa qualcos anca fòra via (vòt veder che la lavora de not e no la me dìs gnente?) e via cosita.
 
Ma no la finìs chi. Perché a 'n zerto punt i te domanda quant che te sei alt, quant che te pesi («Novanta chili, cramento, ma zerco de calàr...- ghe digo») se te sèi magari màt.
E l'è zà tant che no i te domanda se te gài l'alzabandéra la matina pensando a na dona nuda o a 'n mascio co la tartaruga.
Ma la pù bela l'ariva ala fìm: «Lei è un terrorista?» (giuro, l'è véra, no l’è na batùa).
Al che anca quei che me fa sta domanda i se mete a rider...
«Scusi sa, ma la domanda è inserita nei moduli.»
E mi: «Scuséme neh, ma se fussa en terorista, vegnirìa a dìrvel? Magari contan dove anca che i soldi che domando en prest i me serve per crompàr bombe?»
 
Se ghe ride su. I soldi en prest i ariva sul cont. Me domando entant che vegno fòra dala banca:
«E se enveze che terorista fussa en mafiós che vòl sol svoltolar soldi?»
«Ah, càvoi soi, se ciàva.»