Putèi, pòdo méterme la mascherina? – Di Cornelio Galas

Va a finir che en de na sala ne vegnirà a domandarghe ai altri: «Ve dà fastidio se tègno la mascherina sula bóca?»

Se và, come sèmper, dal màssa al mìga, en Italia. Cosìta, quando zamài de covid no s'en parla squasi pù (perché adès l'anda en televisióm e sui giornali l'è quela dela guera) eco che vèi fòra 'sta storia dele mascherine. Che no se deve meterle nei bar e nei ristoranti (né a l'avèrt né al serà) ma biogna enveze avérghele sula boca e sul nas ai concerti e anca a scòla, trane che quando i boci i fa ricreaziom... Ma sol vinti minuti neh.

E po' se se lavora, se sa. Ma no en teatro. Sì quando se va a veder zugar al balóm. O èlo viceversa? Ve dirò che no capisso pù gnènt.
E me sa, da quel che vedo en giro, de no esser l'unico embranà.
Anzi, me par che i è tanti quei che... no i se fida. Per esempi, zent che và dénter el ristorante ancora col telefonìm (con su el ghirigori del grin pass) e la mascherina e i spèta che i i ghe dàga n'ociada e po' el via libera.
L'istéss al banch del bar quando se tòl en caffè. Che squasi te dropi la mascherina come... filtro. No se sa mai.
 
Tèi, l'è zamai do ani che sém en ste condizióm. Che ala fim no te ghe credi pù a nessùm, gnanca a quei che parla dentro la televisiom, oscia.
Ma come, fim l'alter dì la néva de numeri de malài, de ricoverài col tubo o senza, de morti.
E adès quei numeri te i trovi sui giornài en fònt... squasi vizini a quei del loto.
E scriti picoi. Cramento.
Ma come? No è passà en secol che i vari dotori i stéva lì da la matina ala sera a dirne cossa se deve far per no ciapàr el covid e adès... al so posto gh'è generài, colonèi, geopolitici che enveze ne dìs tut su canoni, droni, cararmati?
 
L'è propri vera, per no sentir pù mal dal dé dove te te sei dàt na smartelada basta dar en colp ancora pù forte... su n'altro dé.
Entant, com'èla come no èla, sem ancora chì che nem en giro co ste mascherine, anca se i dis che en zerti posti almem, se podrìa farne a mem. Perché fém così?
«Ma, 'sa vòt – el m'ha dit en vizim de casa, – a so temp n'avevo crompà na zinquantina per pochi euri... n'ocasiom al mercà. Me 'sa 'n pecà lasàrle lì nela so confeziom nel casét del bagno».
N'altro: «Varda che st'inverno e anca quel passà no ho mai ciapà gnanca en rafredór neh... Le fa pu bem ste mascherine che zerte medizine».
E n'altro ancora: «Se devo dirte propri la verità, senza mascherina, me par de nar en giro mèz nùt...».
E na dona: «Ma sat che co la mascherina no serve gnanca meterse el rosseto? Te guadagni temp la matina».
 
Ensoma, ne sem abituai, bem o mal, a sti tochi de pèza su nas e boca.
E po' no se capìs: èlo sol el virus che pol nar en mùa? Noi no podém mai cambiar idea?
O meio, dai, i n'ha mes en testa sta roba. L'è difizile dala matina ala sera no pensarghe pù...
Va a finir propri che en de na sala (come se féva quando se podeva fumar anca lì) ve vegnirà a domandarghe ai altri: «Ve dà fastidio se tègno la mascherina sula bóca?»