Quando se mandéva i boci ai fréschi – Di Cornelio Galas

Doi i motivi: che no i fessa el baign nel lac o nela Sarca, no gaver i boci tra le bale quando no i neva a scola

Sì, fa calt che no s'en pòl pù. Pù calt del sòlit. Ma no l'è, diséntela tuta, che nei ani passài, d'istà se dovés meter l'embotìa sora i linzòi dai.
E tutmal me ricordo che da bocia - parlém dei ani Sesanta zamài - 'péna finì le scòle i ne mandeva tuti ai freschi, su ala Colonia San Vincènze, en Vél.
Per do motivi i ne mandéva su en montagna (milietré neh, miga i domili del Stìf).
El prim: no averghe i matelòti tra le bale tut el dì vist che per arivar ala fim del mes i doveva laorar en doi.
El secont: perché se no, magari, ne trévem nela Sarca o nel làch. E l'era pericolós: miga sol apena dopo magnà.
 
En Colonia (quei de Trènt e de Roverédo i neva al mar a Cesenatico) se ariveva da Arco co la coriera.
La stràa l'era de gièra e streta. A ogni tornante l'autista el doveva nar envanti e 'ndrìo. Pò meter la ridota e sperar de no spacar i spegièti contro le rame dei pézi.
Ala fim, passà la Capana dei Alpini, el monument (ai Caduti) al bivio per S. Barbara, la casa dei Maino... ale tante i te féva smontar.
Co l'apelo, e na fugazéta per la colaziom.

L'era i tempi del maestro Miorelli e dela maestra Saibanti. Co la Loredana en cosìna e n'òm che el féva de tut: dala legna al giustar le porte, dal brevàr l'ort a nar nei boschi per fragole e ampomole.
Se dormiva en cameróni tipo quei de la naja. Anca poch dopo disnàr. Che ancor ghe penso quando, apena magnà, som lì che me encocono via.
La neva de minestre e minestroni. De salata e pomodori.
Pò gh'era anca le «svizerine» (così i ghe ciaméva ai macinati còti tipo hamburger de ancoi) e fortàie (co n'òf s'en féva squasi doe), pam nero e dur.
Sol la doménega gh'era ne feta de torta. E bisogneva dir tuti ensema: «Viva S.Vincenzo!». Così forsi ariveva anca le fete vanzàe.
 
La maestra Saibanti, davanti a tuti, col so bastom per caminar, la déva el via ale gite a pè: «Tre bei alpim andavano ala guerra...». Oh, la néva envanti a cantar anca en quart d'ora neh...
Se arivéva su a Malga Zanga, ai Finoti po' en là, vers la Val de Gresta.
Ma prima zò, ai piani, dove guai se i te vedeva tirar su una de quele bone carote... T'en ciapévi na rata subit e una dopo, arivài de volta.
Gh'è na foto, de quei ani, dove se vede sto gróp de boci. I pù picoi davanti, quei medi drio e po' altri su le banchete. Drìo a tuti i stangoni.
 
Le vacanze ai freschi l'è finìva de solit el dì dela féra, a Arco, de Sant'Ana. Dove le mame le nèva a crompar le nove canotiere e mudande vist che quele (poche) dropàe en Colonia le era zamài da butar via enséma al grep.
Dopo la Colonia è vegnù (per mi e altri) el temp dei campegi coi scaut.
Semper per nar ai freschi. Ma en de n'altra maniera...
Se tornéva tutmal semper coi dinòci mondài come i zifolòti. Colpa dele sgiéve... semper nei posti sbagliai.