Cossa avénte emparà dal covid? – Di Cornelio Galas

Déi déi nelà… A quei envànti coi ani, o che zà i stà mal de suo, ghe dém en buster. Cioè sarìa el busquàter. Tanto…

Oh, entant no l'è miga finìda neh. Perché sèita a esserghe varianti de sto virus maledeto.
Per esempi l'ultima la vèi da la Francia. La se ciama Omacron.
Scherzi a parte, adès savém tante robe che do ani e passa endrìo no avréssem gnanca enmaginar de dover emparar.
Per esempi: gnanca a l'asilo a so temp i n'aveva spiegà come se fa a lavarse bèm le mam. De sora, en banda, de soto. Col saom dapertut. E oio de gombet.
Ve ricordé no quando la D'Urso la feva leziom en televisiom su sto modo de lavarse le mam. Robe che gnanca el maestro Manzi de sti ani...
 
Ma no l'è sol questa la roba che avem emparà. Gh'è anca quela dele mascherine. Che no le è tute gualive.
Gh'è quela chirurgica (do cordesele e 'n toch de tela), quela Fpp2 (fata per proteger do volte de pù), quela Fpp3 (fata per proteger tre volte de pù).
E po' i Dpcm (dime perché come moverme), le autocertificaziom (me ciamo così, som nat el tal dì e volerìa nar là a far quel che dovrìa far), i loch daun (se te vai for de cà te ciapi la multa) e tuti i numereti che i diseva su ala televisiom ogni sera (tanti che ha ciapà sto virus, tanti en ospedal, tanti entubai, tanti, purtropo, i morti).
Erem arivai a 'n moment che se te vegniva da starnudir for de casa i te vardeva tuti come se te fussi na bolp co la rabia. Barèa...
 
Ala fim è arivà i vazini. E po' el grin pass se te volevi nar en giro e anca a laorar «a posto».
E po' ancora quei che no voleva vazinàrse e gnanca avérghe sto tot de carta per podér nar for de casa. Casini.
Come quando (prima) no se trovéva le mascherine se no a pagarle come oro. Così come de colp era vegnù a mancar anca l'amuchina.
Me par tut destrani. Come se parlés del temp de guera de me por papà.
E tutmal l'è storie squasi de l'alter dì neh. No l'è che sia passà sècoi.
 
Come sénte messi adès? Disente che st'am el premio Nobel per la medizina i avrìa dovù darghel al Putin. Perché co la so guera en Ucraina per qualche més (e anca adès, dai) l'è come se l'aves trovà el modo per farne desmentegar el covid.
Però no l'è finìa. Cramento. Zamai l'è pu fazile ciapar el virus che el contrari.
I dis che ste ultime variaziom no le è così brute come le prime. Che se se è vazinai l'è questiom de soportar malani tipo rafredór per na desina de dì.
Però zà i méte le mam envànti: meio – per quei envànti coi ani o che zà i stà mal de suo – en buster. Cioè sarìa el busquàter dopo la terza dose.
E magari st'autum i ne farà ensema anca quel contro l'influenza. Tant per esser sicuri.
 
Entant via libera a tuti. Che l'è calt. Che gh'è i concerti a l'averta, che riscominzia le corse tuti ensèma, che se va en spiàgia tacài come el viscio.
Pò, en otobre, tanto vegnirà fora n'altro tipo di coronavirus. E tuti quei vazini che a Trent (e miga sol lì) i è scadui e bisogna butar via?
No sarésselo stà meio mandarli en quei paesi dove i ghe n'aveva e i ghe n'ha pochi?
Ma no, se ciava. Tanto prest i farà quei novi che va meio...