Elezióm e bót de fèr – Di Cornelio Galas

«Avé magnà fim adés...? Magné anca 'sta féta de salàm, ne là.»

Oh, méto sùbit le mam envanti: no ghe sóm mai vegnù fòra sui casini dele legi eletorali.
Me ricordo che, quando scrivevo su l'Adige, se gh'era dei dubi bastéva farghe na telefonada al Bruno Bubu Cagol: l'era lù quel che – pù de tuti – el te savéva dir, partendo dai numeri, chi sarìa stà elèt e chi trombà.
Ma anca el por Bruno, secondo mi, el se troverìa embroià, adès, quando se parla de collegi «blindài», de collegi «sicuri», de «dirito de tribuna».
 
Perché, a gnanca do mesi da le elezióm, l'è soratùt de ste robe chi che se parla pù che de programi per nar fòra dai casini.
Eco – gh'el domando a quei pù lezui e studiai – volé spiegarme perché, ancor prima che nénte tuti (tuti, parola grossa... me sa che tanti i ne farà a mem, purtropo) a votar gh'é zà quei che se sente en de na bót de fer?
Come dir: «Varda, noi te candidém lì perché sém sicuri de nàr su...».
 
Per amor de Dio, no sté parlarme de Rosatellum, de Collegi uninomali, de proporzionale, de altre gàbole perché – ve l'ho dit prima – no ghe capìsso gnent.
Gnanca se me lezé piam piam tute le so regole.
Digo sol che, a parte i sondagi, deve esserghe qualcos che me sóm pèrs.
Se no, no se capìs come en colegio el poda esser sicur, blindà, a prova de canóm (o de cretino, come se dis per altre robe).
 
Ma fénte anca finta che – co sta lége vegnùa dopo el Porzellum (bel nome ah?) – se pòda dalbom deventar onorevoli al zento per zento se te vai en d'en colegio sicur... dove i altri i pòl anca prometer zero tasse, soldi, el bengòdi, e pólo e patatine per tuti ma i perde, oscia, de... sicur prima ancora che se vaga a votar.
Eco, me domando e ridomando, chi èlo che decide i nomi de sti fortunadi?
 
Na volta gh'era le primarie (soratut nel Pd - e ’na volta i ha elèt e Rossi che l’era del Patte non del PD), le parlamentarie (nei zinque stele), le riunióm nele cése (la vecia Dc dopo la messa, po' altri) propri per tirar fòra i nomi da méter en lista.
Adès – magari l'è ’na me idea neh, pòdo sbagliarme se sa – me par che ghe sia enveze pù en córi córi a spartìrse le caréghe.
Tra quei che gh'era prima (e volerìa esserghe ancora) e quei che, restài fòra a so temp, cossa hai fàt? I ha més su en partito nof, magari col so nome, pur de no restar taiài fòra.
 
Ala fìm de la fera, tra l'altro, gh'è anca quei che dìs che ghe volerìa nomi novi en politica.
Basta con quei che da ani magna a sbafo. Va bem tut. Fim quando se narà en gabina a votar.
Dopo aver vardà le liste, i simboi, forsi qualche santìm arivà per posta ensema ale solite promesse bèle, scrite en stampatèl.
 
Vèi en ment quel che ani fa, en d'en segio del Basso Sarca, l'aveva més dénter la scheda eletoral piegàda tante volte.... na féta de salàm.
E l'aveva scrit: «Avé magnà fim adès... Magné anca questa valà».