Quando se spetéva l'àsem de Santa Lùzia – Di Cornelio Galas

Bisognava méter fora el piat de sal gros propri per l’asenèl. E no’l patìva la sé…

Gh'era quel che anca a dése ani el ghe credeva ancora. Sia a Babo Nadàl che a Santa Lùzia.
E quel envéze che, pur savèndo che l'era tuta na bàla, el féva finta de créderghe. Perché... perché l'era bel dài spetàr la matina del trédese dizember per veder se era arivà qualcòs de regalà.
Tut scominziéva la sera prima. Prima de Carosèlo, se sa.

El so bel piatìm més sul davanzàl de la camereta. Piém de sal gròs, per l'asenèl de Santa Luzia. Che pù de na volta m'ero domandà tra mi e mi: «Ma no staràlo mal, po', l'asenèl a forza de magnar el sal en tute le case dove el và?»
No se scrivéva leterine a Santa Luzia. Quele se le mandéva sol a Babo Nadàl. Chisà come mai. Forsi perché Santa Luzia no la portéva mai zòghi ma sol robe da... magnàr.
E difàti, nel piatìm (restà vòt, senza pù el sal) la matina se troveva semper le solite robe: mandarini, fighi sechi, biscoti che pareva, precisi precisi, quei che la féva la nona per le feste. E dele volte anca dàteri. Dolzi che pù dolzi no i podéva esser.
Tuti enfrizai dénter en bachét. Che te t'empienìvi de zùcher slavà quando te i tirévi fora da quei arsenài.
 
Prima, tut mal, gh'era tuta la so bela messa en scena.
Qualchedum el néva soto cà a sonàr i campanèi. E quel l'era l'ultim segnàl, l'ultim avìso.
Tuti soto i linzòi e le cuèrte. Guai a farse veder da Santa Luzia coi aci averti, Perché la t'avrìa tirà qualcos de 'nfumegà.
E te saréssi deventà orbo come la Santa. Che alora se se domandéva:
«Ma se Santa Luzia l'è orba, come fàla a veder se sem soto le cuerte? Elo l'asenèl che ghe dìs tut quel che suzéde?»
 
I problemi no i gh'era se en faméa um l'era l'unico fiòl.
Ma mi, per esempi, con altri do fradèi, dovevo semper begàr per far le part giuste de quel che Santa Luzia l'aveva portà.
Se féva anca i baràti. Tipo: te dàgo zinque biscoti per tre fighi sechi. O do mandarini per quatro dàteri.
Miga semper se finìva ste contratazióm senza begar.
Però, ala fim, come se diséva alora... arivéva sèmper el vescovo. Che voléva dir do bele sberle per tuti quanti.
Anca a quel che, poréto, no l'aveva dìt gnanca «baf».
 
Quando se deventéva pù grandi se podéva far le stròzeghe.
Na bèla sogàta longa. Con tacà tanti scanderlòti (quei de pomodori, fasòi, anca dela carne en scatola... neva bem tut) che i féva ciàs su la stràa. Gh'era quei che li tachéva ale bici.
E su e zo per el viàl. Fim quando ste stròzeghe magari le se 'mpegnéva da qualche banda.
E se rotéva la sogàta. E tuti i scanderlòti i néva per so cont...
Pò tuti zìti. Che i bocéti pù picoi i doveva endromenzarse.
Per spetar quel'asenèl che de nòt el gireva dapertut, Oh, propri en tute le case neh.
Magnando sal... senza averghe mai sé.