I «scarpari» de Riva i gh'è ancora – Di Cornelio Galas

Ve ricordé quando i organizava i rinfreschi dapertùt? Beh adès no vanza mai gnènt...

L'è sto chì el temp (po' ghe n'è anca per st'istà) dela Expo Riva Schuh.
Ensoma, dela féra dele scarpe de Riva. Che la gh'è da ani neh. Semper pu granda.
Sol che adès i dis che ghe sia na grossa concorenza. E che 'sta féra, a Riva, la podrìa finir. E nar en qualche zità pù grossa.
Tutmal me ricordo quando i aveva fat la prima fera dei... «scarpari».
Perché cosìta i ciaméva, en Busa, quei che, nei alberghi, i féva veder le novità de l'istà (d'inverno) e de l'inverno (d'istà).

Tanti cinesi anca alora, Ma soratut todeschi, Che 'l presidente de lori l'era difati en todesch.
Quando i vegnìva (e anca adès quando i vèi), l'era na festa per bar, ristoranti, alberghi, boteghe.
L'è quel che 'n tagliàm se ciama «indotto». Cioè tanti che guadagna sol per el fatto che gh'è quei che lavora en féra.
Che no l'è quela de Sant'Andrea, dove, oltre al rest, va tant anca la ciopéta co la porchéta e 'l toróm.
No, Disénte che la féra dele scarpe de Riva l'è cresùda am dopo am.
Prima, come disévo, nei alberghi. Pò nei capanoni de la Baltera, vers Varóm.
 
Fato sta che alora, come adès, gh'è tanti che fa i conti co 'sta féra. E anca co le altre, se sa, ma su questa soratut.
Se no la ghe fùssa pù ensoma sarìa squasi come se da Riva nés via metà dela Cartéra. O, che sonte, en tochét de spiagia, chioschi compresi.
E pensar – mi m'el ricordo neh – che tut era nat co na féra (picola) enventàda dal pòr Bepi Degara (mort qualche stimana fa). Quela dei camper, dele robe per el campégio.
 
I era pochi quei che ghe credéva alora en quele esposizióm fate nei prài davanti al Palacongressi.
«Me par robe da zìngheni, – diseva qualchedum. – Mah, forsi, vizìm ala sede dela Fraglia starìa meio na féra de barche no?»
O ancora: «Ma chi vòt che vegna a Riva a vardar ste sègiole, ste tende, ste machine dove te devi magnar e dormir tuti tacài?»
 
Epura propri da quela féra lì è vegnù po' tut el rest. Co l'inaguraziom che se féva semper en quel bar del Palacongressi. Tuti enmuciai.
Con quel presidente dei espositori todeschi (Friedrich Karl Eichholz) che, diséntelo, l'era na sàgoma. E quando tuti – dal sindaco a quei de la Provincia – i aveva dìt la sua 'l féva la... so scenéta.
Magari co na scóa en mam. O fasèndo finta de ciapàr su baraca e buratini e nar da dove l'era vegnù.
Fato sta che tuti i aspetéva quel so modo de far e de dir. E sol dopo se néva a zacàr le robe del rinfresco.
Zà, el rinfresco. Dove gh'era semper de tut. Dal persùt ale bruschéte. E 'ntorno bicièri semper pieni. Quei che te fa alzar el gómbet, per dir.
 
Eco, el rinfresco. Gh'era quei specializài per magnar e bever agratis en ste ocasiom.
Zent che nei altri dì la néva de vim tàpo corona e pàm e bóndola. Vestìa en qualche maniera. Ghe te vegnìva voia ensóma de darghe zinquanta lire, de farghe la carità.
Eco, questi, quando gh'era i rinfreschi de la féra (no sol quela dele scarpe) i se metéva en gringola.
Col vestì de quando i s'era sposài o i era nài a l'òbit de qualche parente, Magari anca la cravata.
E i vegnìva denter piam pianèl... come se tuti i li spetés. Perché i era dele autorità da fòra, Finì i discorsi, pronti via, i tachéva via... e nesuni come lori i era bòni de far fòra en pochi minuti na bina entréga de bruschete, de persùt, de galetine... e tanti bicieri soratut de spumante,
 
Col temp qualchedum el deve averghe dit qualcòs. Perché i è deventài semper de mem. Tutmal no vanza mai gnènt...