El Carneval de 'na volta – Di Cornelio Galas

Bei tempi quand che a casa le none le féva i grostoi, o le fritole de pomi. Tut roba pu bona... no le monàde d'ancòi

No parlo de dése ani endrìo neh. Gnanca de vìnti. E gnanca de trenta o quaranta.
Cramento se som deventà vecio oscia…!
Me ricordo sol che quando vegnìva i dì de Carneval se s'enzignéva a vestirse... da Carneval.
I pù fortunai, come mi, fiol d'en marangóm, i se atrezéva prima.
Carta de giornai veci bagnàda co l'aqua e po' messa nela còla. Vegniva fòra en gióm che spuzéva de tut. T'el struchévi e dale mam coléva zo en... brodo scur, sporch, tacaìz.
Eco, alora se tachéva via a darghe na forma de maschera, de qualcòs. El nàs, la boca, i oci, le recie.
 
Pò tut en den bazinèl sora la fornèla. Fim che 'l se sechéva. E ocio... che no 'l se rovinés. Che tut el stéss ensèma ensóma.
Al rest se ghe penséva dopo. Coi colori che mi trovevo en falegnameria. Magari anca en pèl de vernìs...
Eco, sugà tut quant, bastéva farghe do busi dale bande. N'elastico robà nel cassèt de la nona.
E la maschera l'era demò pronta. Zerto, no bisognéva vardarghe denter. Perché te avréssi podù ancora lézer qualcos de quel giornal vecio. Ma de fora la maschera la féva la so bela fazióm dai.

Questo per la facia. Sul rest? Se dropéva vècie telàre. O linzòi che zamai i gavéva pù busi che alter.
En qualche maniera se néva po' en piaza. Dove i fioi dei siori i gavéva zamai le maschere de Zoro de plastica e anca la spada e 'l mantèl crompai ala Upim.
Ma noi, come dir, ne sentìvem pù contenti de quele stràzze che gavévem endòs. Perché, per dir, ogni am po' se cambiéva colori e forme dela maschera. Nasi pu grandi, recie pu picole, boche co la lengua defòra come féva i Rolinnstòm.
 
Se néva drìo i carri, a Arco. Con quei che guideva i tratori che i ostìéva:
«Cramento, boci, se no sté pù lontani ve schizo col trator, diaolporcoooo!»
Ma tut se féva, pur de finir nele foto (che pù tardi avrìa fat propri mi) che sarìa finì sul giornal.
Pecà che 'l pù dele volte i ne fotograféva de schena. E soto le stràzze se vedeva anca le mudande... magari col ból zàt de quel che l'era ancora en pissòt, um che se la fa endos ensoma, pur de no fermarse per prim,
 
Bei tempi. Perché en quei dì, a casa, le none le féva i grostoi. O le fritole de pomi.
Tut roba pu bona - disévem - de quei che va en giro lecando el zucher filà da quei bacheti.
Ma l'era sol envidia. El fato l'era che el zucher filà, semai, i te lo crompeva sol ala zòbia grassa.
Per no dir l'ultim de Carneval.
 
E i coriandoi? Ho vist en sti dì chi quant che costa en scartòz de coriandoi. Lamadòna...
Noi ne rangievem co na machineta che avevém trovà nel magazim de amizi, fioi de n'idraulico.
Te metévi soto sti fòi de giornal (o de quele poche riviste a colori che gireva alora) e zachete... quatro coriandoi ala volta.
Ghe voleva na giornada de tich e tach per empienir en sachetel. Che po' te pareva pecà butarli per aria.
E alora se sparmiéva... disente che s'en tireva pochi ala volta.
E gh'era anca quei che tireva su quei apena butai, quei che se podéva, se sa.
 
La sodisfaziom pu granda? Quando a qualchedum gh'è vegnù l'idea de dropar la zendro... misciàda ala farina bianca.
Che fumeghère, putei. Che engranizàde. Fim quando ariveva da casa qualchedum col batipani:
«Va bem la zéndro ma, Cristo, la farina... ve 'mpano le cotoléte cola paciéca stasera, va bem cosita?»