Hat vist Sanremo? Mi no neh – Di Cornelio Galas

I ha lassà cantar e napoletàm? Ma alóra, perché no far na canzóm en trentim?

Ieri sera è finì el Festival de Sanremo. No so chi che ha vint perché gò mandà ste righe al Guido per temp, cioé sabo dopodisnar.
Adès el l’averà za scrit. Lezélo lì, su L’Adesòt.it.
Podo però zà dirve che come tuti i ani, volendo o non volendo, de Sanremo se finìs sempreper parlar.
E chi bisogna fàr na zernìa.
Gh'è quei che anca su Fèsbuch i scrive che no ghe ne frega en balóm. E però i critica quei che canta o fa monae sul palco...
Ma alora, benedéti, l'avé vist Sanremo en television, no sté far finta. No sté dir monàe.
Pò gh'è quei che ne parla magari anca bém. Ma se te i encontri per stràa, da soli, i cambia come dal dì ala nòt. E squasi i s'encàza con ti perché te ghe disi che tutmal no l'è stà mal...
 
Ensoma Sanremo, come dìs la reclam, l'è... Sanremo. Soratùt perché en quei zinque dì del Festival l'è zamai emposibile no lézer o sentir de quel che suzéde en quéla zità dei fiori.
E po' gh'è sèmper qualcós che fa discuter. Pù nel mal che nel bém, se sa. St'am è vegnù fòra quela storia del Giòn Travolta, del bal del qua qua (ma dài...), dela reclam de quele scarpe e la facia de um che l'è lì sol per i soldi e ancora el se stufa.
Per paregiàr i conti e per no farse tor en giro, Rassel Cro l’è vegnù scalzo…
 
Le canzóm? De tute le sort. Ensèma, nel stéss piàt, musica per tuti i gusti.
Cantanti de na zèrta età e bociéti che per farse la barba basta che i dropa el sugamam.
Qualcheduna de ste canzóm magari la resta nele recie. O i te la meterà nele recie quei dele radio.
Altre le paserà come la nef quando vei calt.
 
Per el rest - pòdo dirlo? - Me par che anca el Fiorelo, stavolta, l'abia scominzià a pisàr for dal vater.
Quando l'è massa l'è massa ensoma.
No te pòi tor en giro el mondo e no pensar che prima o dopo qualcòs te torna endrìo.
Disénte che le scenéte , dàmela tòmela, le è semper quele. E se no le è le stesse le se somiglia tant.
Per no parlar dei travestimenti. D'acordi, sem a Carneval, ma gnanca ale feste de classe nesuni se vestis pù da dona.
 
Ma se sa, così la va. Sanremo, diséva qualchedum ani fa, l'è na specie de Messa laica. Cosa vol dir no ste domandarmelo, ma... tutmal la Rai la ghe dà semper la so benedizióm.
Ah n'ultima roba (ma miga per far el solito trentìm musóm neh). Ho vist che i ha ca
mbià regolamento per far cantar na canzóm tuta en napoletàm.
Va bèm. E, perché no, se fa l'istess anca per altri dialeti. Compreso el nòss trentim?
Giuro che non tirém fora el nòs libro sui modi de dir en trentim…