L'è pù fàzile morir che viver – Di cornelio Galas

Na volta che te sei mort, caro mio,
no te ghe séi pù su stà tèra balerina.
No te sài gnanca se 'l gh'è sto Dio
dai, no stà zercar, sém tuti in bina.
 
Quel che no capìsso, anca se ho lezù
l'è cossa fém tuti i di, senza pensarghe
el tram tram, nar envanti, ancora de pù
anca strusìàr, ai altri la colpa po' darghe.
 
Dai, dime ti, chi èl che no ha mai begà
con qualchedum, anca per na monada?
E lassa perder anca quei che mai ha ligà
disente che l'è denter de noi l'embroiada.
 
No capìm gnente quando fem su casini,
anzi, seitém a farli, magari anca gualìvi
«Vardè che ha tacà via lori per primi»
Con quel ne sentim a posto, tra i olivi.

Ma 'ntànt, quante robe bèle ne perdém?
No serve tirar envanti e 'ndrio i orolòi...
Ariva, prima o dopo, el cont de l'àmem
quel che tira na riga, anca se ti no te vòi.
 
E tirém innànz, come diséva quel por om
quando i lo stéva portando 'n do copàrlo
ma no gavém quel so stéss còr dalbòm
no saréssem boni gnanca de dir: «mi parlo».
 
Sem sviài da telefonini, cine, televisióm
par che tut sia fàzile, se ciàva el domàm
po' te ghe pensi su, te vèi anca el magóm
ma se ciava, te disi, dame en sugamàm...
 
No l'è vera quel che i dìs quando te mòri
te 'l sai anca ti che no te eri propri en sant
l'è che stà mal lì al zimiteri, tra quei còri
parlar anche dei to pecài, propri quel tant.
 
Se va envanti, tutmal, l'è meio che endrìo
anca se forsi al ricovero i dis l'incontrari
Cossa vòt che sia no zernir tra tuo e mio
ala fim, soto tera, no gh'è bastiam contrari.